Tómas Guðbjartsson, skurðlæknir og baráttumaður fyrir náttúruvernd, er undrandi á því að Arion banki vilji blása lífi í framkvæmdina við kísilver í Helguvík.
Kjarninn greindi frá því á föstudag að Stakkberg, sem er í eigu Arion banka, hefði upp fyrirætlanir um að ræsa ljósbogaofninn að nýju. Er markmiðið að endurbæta verksmiðjuna og auka framleiðslugetuna.
Tómas segir í grein sem birtist á Vísi að það sé eins og Arion banka sé fyrirmunað að taka skynsamlegar ákvarðanir þegar kemur að kísilverinu. Ákvörðunin nú sé óskiljanleg og siðferðislega röng.
„Allir þekkja hörmungarsögu United Silicon, verksmiðjuhróaldi sem var plantað niður í Helguvík, nánast í íbúðabyggð. Ekki nóg með að verksmiðjan væri sérlega ljót heldur gerði útblásturinn fjölda fólks, þar með talin börn, í Reykjanesbæ alvarlega veikt. Þetta reyndist svikamylla þar sem eftirlit brást algjörlega, eitthvað sem fjármögnunaraðilinn Arion banki getur ekki firrt sig ábyrgð á og hefur kostað bankann, lífeyrissjóði og kúnna hans tugi milljarða. Sem betur fer var verksmiðjunni lokað í september 2017 en síðan hefur bankinn reynt að selja óskapnaðinn úr landi,“ segir Tómas.
Tómas segir engu líkara en að bankinn ætli sér nú að nýta sér bágborið atvinnuástand á Suðurnesjum vegna COVID-19 og ekki bara endurræsa heldur stækka verksmiðjuna. „Stækkuð mun verksmiðjan auka kolefnisspor Íslands um 10%! Ætla íbúar Reykjanesbæjar og Íslendingar að sætta sig við svona vinnubrögð?,“ spyr Tómas sem er augljóslega ósáttur.
„Arion banki kann greinilega ekki að skammast sín og gerir greinilega ráð fyrir að fólk og fyrirtæki haldi áfram viðskiptum við hann - óháð fjárfestingarstefnu. Sem ég held að sé misskilningur árið 2020 - enda gullfiskaminnið ekki algjört.“
Grein Tómasar má lesa í heild sinni hér.
