Það var tilfinningaþrungin stund á Keflavíkurflugvelli í gær þegar tvær fjölskyldur frá Úkraínu komu til landsins eftir að hafa flúið heimili sín í Úkraínu vegna innrásar Rússa sem hófst fyrir rúmri viku.
„Það var blanda af létti og einhvers konar fögnuði þarna langt undir yfirborðinu en um leið var þetta það erfiðasta sem ég hef á ævinni gert,“ segir Sveinn Rúnar Sigurðsson, læknir, sem tók á móti fjölskyldunum ásamt konu sinni í gær.
„Önnur þeirra er eiginkona bróður konu minnar sem er íslenskur ríkisborgari en er frá Úkraínu og starfar hér sem læknir í þágu Íslendinga. Hin konan er vinkona hennar og barn sem ég kann ekki mikil deili á en að sjálfsögðu opnuðum við heimilið okkar fyrir þeim öllum,“ segir Sveinn í samtali við Fréttablaðið.
Sveinn segist aldrei hafa búist við að þurfa upplifa viðlíkan harm ástvina á Evrópskri grundu og nú. Viðbrögð kvennanna hafi verið eins og við var að búast.
„Þær voru báðar í áfalli og það braust út með mismunandi hætti, önnur var stjörf og hin var buguð,“ segir Sveinn og það er ljóst að honum þykir erfitt að ræða þetta.
„Að heyra hana lýsa þessu ferðalagi undir sprengjugný með börnin á vergangi – þetta er ólýsanlegur harmleikur og þjáning.“
Eiginmaðurinn aldrei haldið á byssu
Eiginmenn kvennanna og feður barnanna voru ekki með í för á Keflavíkurflugvelli í gær.
„Um klukkutíma áður en þau fóru yfir landamærin þá var tilkynnt um þessa herkvaðningu sem tekur til allra karlmanna frá 18 til 60 ára. Við fengum þær fregnir rétt fyrir komu þeirra í gær að allavega eiginmaður annarrar, bróðir eiginkonu minnar, væri kominn í herinn,“ segir Sveinn.
„Þetta er maður sem framleiðir glugga og á tvö lítil kaffihús og hefur aldrei haldið á byssu. Staðan er skrýtin, óheilbrigð og á ekki að líðast á 21. öldinni.“
Hægt er að lesa viðtalið við Svein og fjölskyldurnar í heild sinni hér.
