Tíðinda að vænta í dag? Þór­ólfur sagður hafa fundað í gær­kvöldi

Ellefu eru nú á sjúkra­húsi með CO­VID-19 hér á landi og tveir á gjör­gæslu, en alls greindust 36 smit hér á landi í gær. Björn Ingi Hrafns­son, rit­stjóri Viljans og höfundur bókarinnar Vörn gegn veiru, segir að tíðinda gæti verið að vænta á upp­lýsinga­fundi al­manna­varna í dag.

Frá þessu greinir Björn Ingi á Face­book-síðu sinni þar sem hann deilir frétt Viljans. Í fréttinni kemur fram að vaxandi líkur séu á að Þór­ólfur Guðnason sóttvarnalæknir leggi til hertar sam­komu­tak­markanir hér­lendis. Þó er ekki talið lík­legt að hann til­kynni hertar að­gerðir í dag, að því er segir í frétt Viljans.

Þór­ólfur er sagður hafa fundað með við­bragðs­stjórn Land­spítalans í gær vegna fjölgunar sjúk­linga með CO­VID-19. Á­lagið á spítalanum er mikið enda enn tölu­verður fjöldi starfs­manna í ein­angrun og í sótt­kví.

„Sam­kvæmt heimildum Viljans er aukning al­var­legra veikinda mikið á­hyggju­efni sótt­varna­yfir­valda sem og dreifing veirunnar um land allt. Ný smit virðast lítt eða ekkert berast inn til landsins eftir að krafan um tvö­falda skimun og sótt­kví þess á milli var sett, en ný­gengið eykst þó dag frá degi,“ segir í frétt Viljans sem má lesa í heild sinni hér.