Christian Hennek, þýskur ferðamaður, sem kom hingað til lands áður en eldgosið í Meradölum hófst kom að tómum kofanum í gær þegar hann hugðist skoða gosið.
Fjölda fólks sem gerði sér ferð að gosstöðvunum í Meradölum síðustu daga hefur verið vísað frá vegna lokunar sökum veðurs. Fjallað er um málið í Fréttablaðinu í dag og meðal annars rætt við Christian sem var fúll yfir því að fá ekki að skoða gosið.
Veður á svæðinu hefur ekki verið gott undanfarna daga og var til dæmis svartaþoka í gærkvöldi. Borið hefur á því að fólk hafi farið illa búið á gosstöðvarnar og eru dæmi um að börn hafi jafnvel verið örmagna með foreldrum sínum.
Í samtali við Fréttablaðið segir þýski ferðamaðurinn Christian að eldgos sé einstakur náttúruviðburður sem hann langi gjarnan að sjá. Hann var þó svekktur, skiljanlega kannski, yfir því að fá ekki að skoða gosið í gær.
„Þegar ég kom til Íslands þá var ekkert eldgos, þannig að ég tel mig vera smá heppinn. Eldgosið er sem betur fer ekki hættulegt fyrir Íslendinga, en þetta er einstakur náttúruviðburður,“ segir Christian.
Hann segist vonast til þess að sjá eldgosið áður en hann fer heim til Þýskalands.
„Lögreglan sagði við mig að vegna veðursins þá væri lokað á gossvæðið, þannig ég fæ ekki að sjá eldgosið í dag. Ég er smá fúll yfir þessu því ég veit að ég myndi ekki týnast í fjöllunum. Ég myndi geta þetta,“ segir Christian.
Fréttablaðið ræddi einnig við Daníel Frey Ólafsson hjá lögreglunni á Suðurnesjum en hann hefur staðið vaktina á Suðurstrandarvegi. „Staðan er búin að vera góð. Það er fullt af fólki að koma og allir sem ætla upp að gosstöðvum eru beðnir um að snúið við,“ segir hann og bætir við að sumir ferðalangar séu ósáttir við lokunina en enginn hafi neitað að fylgja fyrirmælum lögreglu.
