Þýski ferðamaðurinn sem leitað var að í Flateyjardal er fundinn, samkvæmt upplýsingum frá björgunarsveitum á svæðinu en mbl.is greindi fyrst frá. Engar upplýsingar fengust um ástand mannsins en lögreglan á Norðurlandi Eystra greinir frá því að skömmu fyrir kl. 19:00 í kvöld fann áhöfn þyrlu Landhelgisgæslunnar látna manneskju í svo kölluðum Skriðum austan Hvalvatnsfjarðar.
„Lögrglan telur líkur á að um sé að ræða aðila sem leitað hefur verið að í dag á þessu svæði. Það á hinsvegar eftir að staðfesta með formlegum hætti,“ segir í færslu lögreglunnar.
Lögregla og björgunarsveitir á Norðurlandi eystra fengu í gærkvöldi ábendingu um bifreið á erlendum númerum, sem væri búin að standa óhreyfð í marga daga í Flateyjardal. Strax var hafist handa um eftirgrennslan eftir eigandanum og kom í ljós að eigandinn heitir Bernd Meyer og er frá Þýskalandi, fæddur 1947 og kom til landsins í júní.
Aðgerðarstjórn vegna þessa máls var virkjuð á Húsavík og björgunarsveitir af Norðurlandi eystra boðaðar til leitarstarfa. Allt að 100 manns komu að leitinni. Leitað var með gönguhópum, drónum og bátum.
