Svo virðist sem að jólandinn sé kominn yfir fólk á Facebook en yfir þúsund manns hafa deilt jólakveðju í opnu bréfi til Þórólfs Guðnasonar, sóttvarnalæknis.
„Kæri Þórólfur. Mig langar til þess að óska þér gleðilegrar hátíðar og góðra daga um jólin með innilegri von um góða hvíld og frið frá amstri og streitu,“ segir í upphafi bréfsins sem netverjar keppast nú við að deila á veggnum sínum.
„Það sem ég dáist að úthaldi þínu og dugnaði. Og hvernig þú tekst á við ógn veirunnar af æðruleysi og ekki minna hve þrautseigur þú ert þegar gagnrýni þeirra misvitru bylur á þér. Og hvernig þér tekst að vera alltaf með nýjustu upplýsingarnar um veiruna ógnarlegu. Mest dáist ég þó að því hvernig þú hefur tekist á við efann, þegar enginn veit hvað er réttast og eina leiðin er að taka þetta í skrefum, jafnvel fram og til baka,“ heldur opna bréfið áfram sem allir deila nú og gera #TakkÞórólfur.
Hægt er að sjá bréfið í heild hér að neðan.
