„Þessa bók leggur enginn frá sér í kæruleysi. Hún situr kyrr. Lesið hana. Lesið hana alla,“ segir Þröstur Ólafsson, hagfræðingur og fyrrverandi framkvæmdastjóri þingflokks Alþýðuflokksins, um nýja bók Bryndísar Schram, eiginkonu Jóns Baldvins Hannibalssonar.
Þröstur skrifar um bók Bryndísar í aðsendri grein í Fréttablaðinuí dag. Eins og greint var frá í vikunni hefur Jón Baldvin verið ákærður fyrir kynferðisbrot , en meint brot átti sér stað sumarið 2018. Margar ásakanir á hendur Jóni Baldvini voru settar fram í kjölfarið en sjálfur hefur Jón Baldvin neitað þeim öllum. Jón Baldvin greindi svo frá því í vikunni að bók væri væntanleg frá Bryndísi, meðal annars um ásakanirnar en bókin heitir Brosað gegn tárin.
„Þetta er litskrúðug bók. Vel skrifuð, frásögnin lifandi og fjölbreytt. Svið atburðanna og tími á reiki. Skyndilega ertu þátttakandi í átökum á Balkanskaga, rétt stiginn út úr dyrunum á Vesturgötu. Glefsur úr ferðalögum og frásagnir af atburðum úr viðburðaríku lífi Bryndísar og Jóns Baldvins (JBH) eru viðlag bókarinnar. Þar er ýmislegt nýtt að finna,“ segir Þröstur sem bætir við að bókin sé blanda „upprifjana sælla minninga og sársaukafull frásögn af hatri, illmælgi og loks útskúfun.“
„Þetta er bók um harmsöguleg örlög sem eru ofin inn í gleði og ástríður. Bókin fjallar um harmleik. Við lestur bókarinnar fór um mig geigur; einhver dulin örvænting var á kreiki bak hverri setningu. Skrifin eru drifin áfram af sársauka og örvæntingu samfara miklum lífsþorsta. Nístandi harmur dansar tangó í gíghólnum. Lífið er dans á rósum, ýmist með eða án þyrna. Bryndís er eirðarlaus í frásögn sinni. Hún stendur í ljósum logum.“
Þröstur segir að í bókinni reki Bryndís „rógburð, útbreiddar lygar, áburð um kynferðisáreitni og haturshlaðnar sögusagnir um Jón Baldvin og þau bæði í samfellt 60 ár.“
Þröstur segist sjálfur minnast rógs í garð Jóns Baldvins strax á sjöunda áratugnum, skömmu eftir frægan Tónabíósfund.
„Honum linnti aldrei. Það hafa margir, ekki hvað síst úr efri lögum samfélagsins safnað glóðum elds að höfði þeirra hjóna. Hvað olli þessu banvæna umtali? Var það öfundin? Ragnar í Smára sagði, að ef við gætum virkjað öfundina hér á landi, þyrftum við ekki aðra orku,“ segir Þröstur meðal annars í grein sinni.
„Í framhaldi af smekklausu dónabréfi, lá Jón Baldvin vel við höggi. Frægur hér sem erlendis, öfundaður í hærri kreðsum, rægður meðal almennings. Hann var kjörið fórnarlamb, fordæmið sem átti að hræða aðra,“ segir Þröstur sem segir að um róg og nafnlausan áburð verði ekki rökrætt.
„Það er eins og sambönd við framliðna, tilveru álfa, jötna eða drauga. Flokkast undir átrúnað. Kannski erum við sem þjóð nokkuð auðtrúa. Látum ginnast fremur af því óræða en að halda á lofti skynsemi og raunhæfi.
Þegar einstaklingar verða fyrir áratugalöngu einelti og að lokun útskúfun, þá breytist lífsþorsti og lífsnautn í lífsháska og martröð. Það er niðurstaða bókarinnar. Þessa bók leggur enginn frá sér í kæruleysi. Hún situr kyrr. Lesið hana. Lesið hana alla.“
