„Það var strax hringt í lögregluna áður en það var rætt við okkur. Það finnst okkur mjög óeðlilegt,“ segir Þröstur Eysteinsson skógræktarstjóri í samtali við Fréttablaðið í dag. Lögregla var kölluð til um helgina vegna slóðagerðar Skógræktarinnar í Dragafelli og gæti farið svo að málið verði kært.
Í frétt Fréttablaðsins segir Sigurbjörg Ósk Áskelsdóttir, skipulagsfulltrúi Skorradalshrepps, að hún hafi fengið nokkrar ábendingar síðdegis á laugardag um að verið væri að ryðja slóðina. Var það hún sem hringdi á lögregluna og óskaði eftir því að framkvæmdin yrði stöðvuð.
„Þetta er mjög sýnilegt og margir sem taka eftir þessu,“ segir hún við Fréttablaðið. Bendir hún á að Skógræktin hafi ekki sótt um neitt framkvæmdaleyfi fyrir þessu og það megi ekki raska umhverfinu á þennan hátt.
„Þá er þetta óleyfisframkvæmd,“ segir hún. Það sé hins vegar í höndum hreppsnefndar að staðfesta stöðvunina og taka ákvörðun um að kæra málið til lögreglu en ekki liggur fyrir hvenær nefndin kemur saman.
Þröstur bendir aftur á móti á að Skógræktin sé alltaf að leggja slóðir og telur hann að ekki sé um óleyfisframkvæmd að ræða. Þannig eigi ríkið landið og Skógræktin hafi umsjón með því.
„Það er alvanalegt að leggja svona slóðir til að komast að landi. Fullkomlega eðlilegur hluti af skógræktarframkvæmd og það er fullt af svona slóðum í skógræktarlöndum Skógræktarinnar, hjá skógræktarfélögum og skógræktarbændum,“ segir Þröstur og bætir við að ekki sé um stóra framkvæmdin að ræða og eins og vaninn sé verði sáð í sárið þegar notkun slóðarinnar verði hætt.
