Björn Leví Gunnarsson, þingmaður Pírata, ber ábyrgð á 31 prósent fyrirspurna sem berast heilbrigðisráðuneytinu. Ekki liggur fyrir hver heildarkostnaður ráðuneytisins við skrifleg svör við fyrirspurnum frá þingflokki Pírata á yfirstandandi löggjafarþingi var eða hversu margar vinnustundir starfsmanna hafa farið í að svara þeim.
Þetta kemur fram í svari heilbrigðisráðuneytisins við fyrirspurn Brynjars Níelssonar, þingmanns Sjálfstæðisflokksins, um kostnað ráðuneytis við skrifleg svör við fyrirspurnum. Brynjar sendi sömu spurningu til allra ráðuneyta. Tilefnið var fyrirspurnargleði Björns Leví, en þingmennirnir tókust á í Bítinu á Bylgjunni í maí.
Sjá nánar: Brynjar og Björn Leví tókust á í Bítinu: „Þú verður að sýna einhverja hófsemi“
Þar sagðist Björn Leví koma úr akademíunni þar sem hann er vanur að spyrja gagnrýnna spurninga:
„Ég er með eftirlit með framkvæmdavaldinu og þegar ég fór inn í fjárlaganefnd fór ég að klóra mér í kollinum yfir gagnsæi í opinberum fjármálum. Ef ég fæ ekki svör legg ég fram almenna fyrirspurn sem verður að svara,“
Þegar Brynjar var spurður hvort þetta væru ekki góð og gild rök sagði hann svo ekki vera, þvert á móti.
„Nei, talandi um fjárlaganefnd þá getur nefndin aflað þeirra upplýsinga sem hún þarf. Þetta er bara út í loftið, það er mikilvægt að þingmenn geti lagt inn fyrirspurnir, þegar þeir undirbúa mál eða þegar fyrirspurnirnar hafa einhverja þýðingu. Hér erum við komnir langt út fyrir allan ramma,“
Sjá nánar: Björn Leví heldur áfram: Níu fyrirspurnir bara í dag
Ráðuneytið segir í svari við fyrirspurn Brynjars að ekki sé haldið sérstaklega utan um tíma starfsmanna sem fer í að undirbúa skrifleg svör við fyrirspurnum þingmanna.
„Svör við fyrirspurnum krefjast mismunandi mikillar vinnu eftir eðli þeirra og umfangi og getur væntanlega numið frá nokkrum klukkustundum upp í nokkra daga fyrir hverja og eina. Í mörgum tilvikum þarf að senda fyrirspurnir til stofnana ráðuneytisins til að fá upplýsingar og því má gera ráð fyrir talsverðri vinnu þar líka.“
