Talsverðar umræður hafa spunnist í Facebook-hópnum Matartips um brauðin hjá Brauð & Co. Einn glöggur viðskiptavinur hóf þráðinn á þeim orðum að svo virtist sem brauðin væru orðin minni en áður. Máli sínu til stuðnings sagðist hann hafa vigtað brauðin eftir kaup.
Brauð og Co hefur slegið rækilega í gegn undanfarin misseri og þykja brauðin þeirra með þeim bestu hér á landi. Þess má geta að fulltrúi Brauð og Co svaraði fyrir gagnrýnina í umræddum þræði og má lesa viðbrögð hans hér að neðan.
Sá sem byrjaði umræðuna sagði að brauð sem hann keypti í dag hafi verið 502 grömm, en brauðið þar áður hafi verið 641 gramm. Fyrir einhverjum vikum hafi hann fengið brauð sem var 1.131 gramm og við það tilefni sagðist hann hafa haft samband við Brauð og Co til að hrósa þeim fyrir að stækka brauðin.
„Þá kom í ljós að þetta virtust hafa verið mistök, brauðin eiga víst að vera í kringum 750g til 800g. Meðalstærð seinustu 6 brauða sem ég hef fengið frá þeim hefur verið 664g, eða um 20% minni en viðmiðunarstærðin. Hvað finnst ykkur, er þetta smámunasemi? Er ég einn um að hafa tekið eftir því að brauðin virðast bara minnka og minnka?“
Margir eru þeirrar skoðunar að ekki sé um smámunasemi að ræða og þá tjáir lærður bakari sig í þræðinum og segist hann ómögulega skilja þessi miklu skekkjumörk. Á flestum þeim stöðum sem umræddur bakari hafi unnið á sé vigt til að tryggja að ekki sé mikill munur á milli brauðanna.
Viðar Brink, markaðsstjóri Brauð & Co, svarar fyrir gagnrýnina í þræðinum og bendir hann á að um handverksbakarí sé að ræða. Það þýðir að alltaf sé sá möguleiki fyrir hendi að varan sé misjöfn.
„Þetta er allt gert eftir tilfinningu hjá bökurum okkar. Stundum eru þau í stærri kantinum og stundum minni. Ekkert brauð er eins og hefur aldrei verið. En þetta er samt allt of mikill munur og á ekki að vera svona. Þegar svona kemur upp þá er eitthvað að klikka hjá okkur og við tökum það algjörlega til okkar,“ segir Viðar og virðast margir kunna að meta viðbrögð hans.
Segir Viðar að þegar brauð er of lítið eigi að selja það sem hálft en ekki heilt.
„Við þurfum augljóslega að taka á þessu og fara yfir þetta með okkar frábæra starfsfólki. Ef við vildum að öll brauðin væru nákvæmlega eins þá væru gildin okkar svoldið öðruvísi. Við viljum að viðskiptavinir okkar viti að þegar þau kaupa brauð, snúða, croissant eða hvað sem er að það var bakari sem gerði þetta með höndunum sínum,“ segir hann meðal annars í svari sínu og bætir við að settar séu miklar kröfur þegar kemur að gæðum.
„[Við] viljum að þið vitið að við munum skoða þetta vel og vandlega. Takk fyrir að halda okkur á tánum.“
