Þorvaldur með skothelda og ókeypis lausn á áhyggjum af Úkraínustríðinu

Það hafa margir áhyggjur af stríðinu í Úkraínu um þessar mundir. Bætist það ofan á slæma geðheilsu landans vegna annarra hluta eins og Covid-faraldurinn og erfiðan vetur.

„Umræða um and­lega van­heilsu er fyr­ir­ferðar­mik­il í sam­fé­lag­inu. Þar er meðal ann­ars fjallað um skóla­forðun barna og brott­fall nem­enda úr fram­halds­skól­um,“ skrifar Þorvaldur Víðisson, sókn­ar­prest­ur í Foss­vog­sprestakalli, í grein í Morgunblaðinu í dag. Þar bendir hann á skothelda og ókeypis leið til að vinna bug á áhyggjum, nefnir hann sérstaklega innrás Rússa í Úkraínu.

Hann bendir á félagslega þáttinn. „En eru til fleiri úrræði sem stuðla að góðri and­legri heilsu? Hvernig get­ur maður aukið birtu­stigið í eig­in lífi, aukið birtu­stigið í sínu and­lega lífi? Ég tel að and­legri van­heilsu þurfi einnig að mæta með and­leg­um úrræðum, sem eru í boði fyr­ir alla sem vilja þiggja.“

Leiðin sem hann leggur til er núvitundarstund eða kyrrðarstund þar sem gjarnan er iðkuð kyrrðarbæn eða biblíu­leg íhug­un.

„Kyrrðarbæn er bænaaðferð sem fer fram í þögn. Í henni opn­ast hug­ur og hjarta, öll vera okk­ar, fyr­ir Guði hand­an hugs­ana, orða og til­finn­inga. Fyr­ir til­stilli náðar Guðs opn­um við vit­und okk­ar fyr­ir hon­um sem við vit­um, fyr­ir trú, að er hið innra með okk­ur, nær okk­ur en and­ar­drátt­ur okk­ar, nær en hugs­un okk­ar, nær en sjálf vit­und okk­ar,“ segir hann.

„Biblíu­leg íhug­un er æva­göm­ul aðferð við að biðja yfir textum ritn­ing­ar­inn­ar. Í biblíu­legri íhug­un er hlustað á ritn­ing­ar­vers­in með hjart­anu líkt og við ætt­um í sam­tali við Guð þar sem hann legði til umræðuefnið. Með þess­ari bænaaðferð leyf­um við orðinu að móta okk­ur og verða hluti af okk­ur sjálf­um.“

Bendir hann svo á Kyrrðarbæna­sam­tök­in á Íslandi sem er hreyf­ing fólks sem iðkar og stund­ar þessa and­legu iðju, sjálfu sér og sam­fé­lag­inu til gæfu. Nán­ari upp­lýs­ing­ar má finna hér: www.kyrr­d­ar­baen.is.

„Það er eft­ir miklu að keppa að leggja sig fram í þess­ari íþrótt, því að sumu leyti er það eins og íþrótt. Maður­inn efl­ist að and­leg­um gæðum með and­legri iðkun og bæn. Líkt og með lík­ams­rækt dags­ins, þá virkj­ast and­leg­ir vöðvar og kraft­ar við and­lega iðju. Slík iðkun og bæn veit­ir ávexti út í lífið, sem ekki fást í ávaxta­deild mat­vöru­búðanna.“