Þor­valdur lýsir á­hyggjum: Vind­myllur gætu drepið haferni hér á landi

„Vind­myllur vindorku­vers hafa drepið á annað hundrað haferni og þrjá kóngserni frá því þær voru reistar á Mæri í Noregi 2006. Og í fyrra og hitt­eð­fyrra drápu vin­myllu­spaðar fimm erni í Þrænda­lögum. Auk þess hafa vind­myllur þessar drepið hundruð rjúpna, fjölda fálka, svana og gæsa.“

Þetta segir Þor­valdur Frið­riks­son, frétta­maður sem um ára­bil starfaði á frétta­stofu RÚV, í að­sendri grein í Morgun­blaðinu í dag. Í grein sinni lýsir hann miklum efa­semdum um að hér verði reistir svo­kallaðir vind­myllu­garðar.

Sjá einnig: Danskur vinur Hauks: Stór­slys ef Ís­lendingar reisa vind­myllu­garð

Þor­valdur vísar meðal annars í ný­lega um­fjöllun um þetta í Bænda­blaðinu og bendir á að haf­örnum hafi á sínum tíma verið nær út­rýmt í Evrópu.

„Eftir að þeir voru friðaðir hafa stofnar þeirra sum­staðar braggast nokkuð, en hafernir eru alls staðar sjald­gæfir. Þeim var nær út­rýmt á Ís­landi, en eftir að hætt var að bera út refa­eitur hefur örnum fjölgað þó hægt miði. Talið er að 2017 hafi 76 arnar­pör verið á öllu landinu. 50 hafarnar­pör verpa á Breiða­fjarðar­svæðinu, tveir þriðju hlutar hafarnar­stofnsins á Ís­landi. Fjöldi hafarna sem vind­myllur í Noregi hafa náð að drepa þann stutta tíma sem þær hafa starfað lætur nærri að slaga upp í allan hafarna­stofninn á Ís­landi.“

Þor­valdur segir að þetta séu al­var­leg tíðindi því í bí­gerð séu þrjú vind­myllu­verð á aðal­varp­svæði hafarna á Ís­landi, þar af tvö í Reyk­hóla­sveit.

„Eitt þessara svæða sem er á Lax­ár­dals­heiði hefur þegar verið skil­greint sem mikil­vægt fugla­svæði. Verði hug­myndir að þessum þremur vindorku­verum að veru­leika yrðu þar reistar um 86 vind­myllur allt að 150 metra háar.“

Þor­valdur hefur á­hyggjur af því að á­hrif vind­myllu­fylkinganna gætu orðið mikil á fugla­líf og á­sjónu lands. Bendir hann á að ernir varpi meðal annars í Gils­firði í Reyk­hóla­hreppi og fyrir­hugað sé að setja upp allt að 35 vind­myllur í Garps­dal við Gils­fjörð. Þá sé í bí­gerð að reisa og reka í fyrsta á­fanga allt að 24 vind­myllur í landi Hróð­nýjar­staða í Dala­sýslu. Þá sé þriðja vind­myllu­verið fyrir­hugað á 3.200 hekturum á Lax­ár­dals­heiði í landi Sól­heima í Dala­byggð.

Þor­valdur bendir á að norska fyrir­tækið Zephyr ætli að reisa vind­myllur víða á Ís­landi, en um er að ræða fyrir­tæki sem er meðal annars í eigu þriggja norskra sveitar­fé­laga.

„Þá vaknar spurningin: hvers vegna í ó­sköpunum reisa þessi sveitar­fé­lög ekki vind­myllurnar í eigin landi heima hjá sér í Noregi? Vind­myllurnar eru allt að 150 metra háar, um tvö­falt hærri en Hall­gríms­kirkja í Reykja­vík, sem er 74,5 metrar á hæð. Mikil sjón­mengun er af þessum gríðar­miklu mann­virkjum sem sjást langt að. Þessir risar með spaða sem snúast með þungum nið og skugga­varpi rísa ekki einn og einn yfir mela og móa heldur tugum og hundruðum saman í stórum flokkum og fylkingum, sem ber við himin og munu setja mark sitt á um­hverfið. Ein mesta auð­lind Ís­lendinga er fegurð og fjöl­breyti­leiki náttúru landsins.“