Óhætt er að segja að sú ákvörðun forsvarsmanna Pírataspjallsins, eins virkasta stjórnmálaspjalls landsins á Facebook, að fjarlægja ákveðinn umræðuþráð hafi vakið viðbrögð innan spjallsins.
Kona nokkur, Þórunn að nafni, setti þá inn færslu þar sem finna mátti viðtal við Bruce Lipton en umfjöllunarefnið var meðal annars Donald Trump og samfélagsmiðlar. Umræðan var fjarlægð án nokkurrar skýringar og var Þórunn mjög ósátt við það.
„Vá...ég var buin að ákveða að kjósa Pírata í ár, en hef ekki verið á kjörskrá á Íslandi í fjölda mörg ár, en ég er snar hætt við! Mun ekki styðja svona ritskoðun! Ég set inn spurningu sem mig langar að fá sjónarhorn Pírata á og henni er kippt úr !!! Svona ritskoðun er mér ekki að skapi! Og ykkur til skammar!,“ segir hún.
Björn Leví Gunnarsson, þingmaður Pírata, tekur að hluta til undir þessa gagnrýni og segist ekki skilja hvers vegna farið var svona með færsluna. Hún hafi verið ágætlega málefnaleg.
Einn af stjórnendum spjallsins hefur beðist afsökunar og segir að ástæðan hafi verið endurtekin umræða.
„Ég vil hvetja þau sem hafa áhuga á að ræða málefni um Trump, heimildir samfélagsmiðla og þær umræður undir þann þráð þar sem þegar eru mjög upplýsandi og góðar umræður. Ég biðst afsökunar á því að þær upplýsingar komu ekki fram. Mér skilst að ætlunin hafi ekki verið að fjarlægja heldur frysta og beina að umræðum sem þegar eru svo ekki séu margar umræður um sama málefni,“ segir stjórnandi spjallsins.
Þegar Þórunn er beðin um að endurskoða þá ákvörðun sína að kjósa ekki Pírata í haust segist hún sennilega myndi skila auðu ef gengið yrði til kosninga í dag. Nú þegar afsökunarbeiðnin er komin og þegar henni verður runnin reiðin sé þó aldrei að vita.
Í umræðunum kveðst einn vona að fólk dæmi ekki Píratahreyfinguna í heild út frá svona atvikum. „Ég held nefnilega að það að stýra Íslandi sé mun einfaldara og auðveldara verkefni en að stýra Pírataspjallinu,“ segir hann.
