„Nú verður spennandi að fylgjast með hvort menn munu færa verð til baka þegar krónan styrkist þó að ég efist um það,“ sagði Þorsteinn Sæmundsson, þingmaður Miðflokksins, í umræðum um störf þingsins á Alþingi í dag.
Þorsteinn kallaði meðal annars eftir því að verslanir lækki verð á nauðsynjavörum nú þegar krónan hefur styrkst gagnvart helstu gjaldmiðlum að undanförnu.
„Afleiðingar kórónuveirunnar hafa komið mjög fram í efnahagslífi þjóðarinnar eins og öllum er kunnugt, þó m.a. með því að gengi krónunnar hefur sigið mjög harkalega en núna upp á síðkastið, svona síðustu viku eða svo, hefur borið svo við að það lítur út fyrir að hún sé aðeins að hressast.“
Þorsteinn benti á að þessi lækkun krónunnar hefði komið fram í vöruverði með harkalegum hætti. Menn hafi verið fljótir til að hækka verð þegar krónan gefur eftir en nú verði spennandi að sjá hvort nú komi lækkun þegar krónan er tekin að styrkjast.
Þorsteinn sagði að þeir sem höndla með neysluvörur á Íslandi hafi ekki alveg risið undir trausti að undanförnu. „Það má m.a. sjá í því hvernig útflutningi á landbúnaðarafurðum hefur verið háttað núna og þar hafa komið fram misbrestir í tollafgreiðslu sem nú er til rannsóknar. Það ríður á miklu fyrir almenning í landinu og heimili þar sem atvinnuleysi er mjög algengt og menn hafa minna milli handanna heldur en annars hefur verið,“ sagði Þorsteinn og bætti við að ábyrgð og festa væri mikilvæg á þessum tímum.
„Þeir hafa líka haldið því fram, kaupmenn, að þetta sé vegna launahækkana sem þeir hafa hækkað verð á nauðsynjum. Nú er það þannig, herra forseti, að þegar ég fer í matvöruverslun þá háttar þannig til að það er búið að fækka þar afgreiðslukössum um líklega sjö af tíu og ég verð þá að álykta fyrst þessir sjö eru orðnir sjálfvirkir að þessir þrír starfsmenn sem eftir sitja hafi fengið svona rosalega kauphækkun. Fyrst að launahækkanir eru svona ríkur þáttur í því að verðið hafi hækkað. Með þessum málum þarf að fylgjast vandlega,“ sagði Þorsteinn.
