Þor­steinn velur smekk­leysu vikunnar: „Gripinn með lúkuna í sam­eigin­legum köku­dunki lands­manna“

„Hann var eins og fleiri gripinn með lúkuna í sam­eigin­legum köku­dunk lands­manna og skilaði fengnum,“ sagði Þor­steinn Sæ­munds­son, þing­maður Mið­flokksins, í um­ræðum um störf þingsins á Al­þingi í gær.

Þor­steinn ræddi hluta­bóta­leiðina í ræðu sinni en mikið hefur verið fjallað um stöndug fyrir­tæki sem hafa sótt sér peninga í hluta­bætur. Festi hf. var eitt þessara fé­laga og sagði Þor­steinn að Eggert Þór Kristófers­son, for­stjóri fé­lagsins, hafi átt smekk­leysu vikunnar.

Snýst ekki um stolt

Fé­lagið til­kynnti að það ætlaði að hætta við að nýta sér hluta­bóta­leið stjórn­valda í kjöl­far gagn­rýni frá ráða­mönnum þjóðarinnar. Sagði hann í við­tali við Morgun­blaðið að „pólitíkin hefði skipt um skoðun“ varðandi hluta­bóta­leiðina.

„Yf­ir­völd vilja eitt­hvað annað en lagt var upp með. Við erum hluti af sam­­fé­lag­inu og tök­um á­byrgð. Nýj­ar á­kv­arðanir eru tekn­ar ef þurfa þykir, maður er ekki það stolt­ur að maður ætli að keyra út í skurð,“ sagði hann í við­talinu.

Þor­steinn sagði í ræðu sinni:

„Og hvað sagði hann á eftir? Hann sagðist ekki vera það stoltur að hann ætlaði að keyra út í skurð. En þetta snýst ekki um stolt, herra stór­for­stjóri. Þetta snýst um virðingu, heiðar­leika og hrein­skilni og hún er ekki til þarna.“

Hvar er lífeyrissjóðurinn?

Þor­steinn gerði svo mál­efni Haga að um­tals­efni en eins og Frétta­blaðið greindi frá í síðustu viku mun fé­lagið þurfa að gjald­færa yfir 300 milljóna króna ein­skiptis­kostnað vegna starfs­loka Finns Árna­sonar for­stjóra og Guð­mundar Marteins­sonar, fram­kvæmda­stjóra Bónus. Sagði Þor­steinn að það að rjúfa ráðningar­sam­band við þá þá tvo kostar jafn mikið og að ráða 20 til 30 hjúkrunar­fræðinga til starfa í heilt ár.

„Fjórði stærsti hlut­hafi í því fyrir­tæki er líf­eyris­sjóðurinn Birta. Það segir í eig­enda­stefnu sjóðsins að það sé mat sjóðsins að gæta skuli hófs við á­kvörðun starfs­kjara stjórn­enda og m.a. sé horft til stærðar og um­fangs rekstursins og þeirra starfs­kjara sem al­mennt bjóðast í því um­hverfi sem fyrir­tæki starfa í. Svo mörg voru þau orð og ég spyr: Hvar eru stjórnar­menn sem eru á vegum líf­eyris­sjóðanna í þessum fyrir­tækjum? Hvar eru þau og hver er á­byrgð þessara stjórnar­manna? Vilja þau kannski koma fram og segja af hverju launa­kjör stjórn­enda í þessu til­tekna fyrir­tæki eru með þeim hætti, að það kosti árs­laun 20–30 hjúkrunar­fræðinga að rifta samningum við þá?“