Þorsteinn Pálsson, fyrrverandi forsætisráðherra, rýnir í flokksráðsfund Vinstri grænna og landsfund Sjálfstæðisflokksins í grein sem birtist í Fréttablaðinu í dag. Þar heldur hann því fram að þögnin um stærstu málin hafi verið meira áberandi en það sem var rætt á umræddum fundum.
„Þögnin um stærstu málin, sem blasa við almenningi og atvinnulífi, var á báðum fundunum meira áberandi en það sem ályktað var.“ skrifar Þorsteinn og bætir við: „Sú þögn sýnir hvernig frjálslynd, hófsöm og klassísk borgaraleg pólitík hefur gufað upp í stjórnarsamstarfinu og vinstri pólitíkin er föst í blindgötu.“
Þorsteinn úrskýrir síðan mál sitt betur.
Fyrsta málið sem hann minnist á er orkuöflun og græn bylting, sem fjallað var um í stjórnarsáttmálanum. Hann bendir á að hvorugur flokkurinn hafi reynt að ræða eða knýja á um skýra stefnu á þessu sviði.
Næsta mál er ákvörðun ríkisstjórnarflokkanna að færa ábyrgð ríkissjóðs vegna ÍL-sjóðs yfir á lífeyrisþega og sparifjáreigendur. Hann segir aðferðina minna á aðferðafræði sem var afhjúpuð í hruninu. Hann bendir á að hún hafi ekki verið kynnt fyrir flokksráði VG.
„Hitt er þó enn eftirtektarverðara að þingflokkur sjálfstæðismanna óskaði ekki eftir stuðningi landsfundar við væntanleg þvingunarlög. Sennilega eru þau ekki nógu lystaukandi til að bera á borð í lýðræðisveislu.“ segir Þorsteinn
Síðan minnist Þorsteinn á heilbrigðisvandan og skuldavandan, og víkur sér síðan að samkeppnisvandanum og bendir á að samkvæmt lista Viðskiptaráðs sýnir að Ísland situr verulega fyrir neðan önnur Norðurlönd þegar kemur að samkeppnishæfni í alþjóðaviðskiptum og erlendri fjárfestingu.
„Enginn bjóst við að þessi alvarlega staða yrði rædd á flokksráðsfundi VG. En það kom verulega á óvart að landsfundur Sjálfstæðisflokksins lét eins og vandinn væri ekki til.“ skrifar Þorsteinn.
Forsætisráðherrann fyrrverandi endar greinina síðan á þessum orðum:
„Kjarni málsins er sá að stærstu óleystu grundvallarmál samfélagsins eru í kyrrstöðu á borði ríkisstjórnarinnar og þau eru ekki í alvöru sett á dagskrá þegar ráðherrarnir leita eftir málefnalegu umboði hjá grasrótinni.
Hlutleysi milli VG og Sjálfstæðisflokks hentar Framsókn vel.
Samfylkingin ákvað svo á nýafstöðnum landsfundi að kjarna málflutning sinn um skattahækkanir til að leysa velferðarvandann og ganga þannig út úr þeirri blindgötu með vinstri pólitíkina, sem VG hefur fest hana í.
Tómarúm frjálslyndrar, hófsamrar og klassískrar borgaralegrar pólitíkur við ríkisstjórnarborðið skapar aftur sóknarfæri fyrir Viðreisn á komandi landsfundi.“
Hægt er að lesa greinina í heild sinni hér.
