Þor­steinn mjög ó­sáttur: Rýr og ó­ljós á­ætlun – „Horfur á al­var­legu höggi“

„Það verður að segjast eins og er að að­gerðar­á­ætlun ríkis­stjórnarinnar í efna­hags­málum veldur miklum von­brigðum. Þegar ríkis­stjórn boðar til blaða­manna­fundar með lúðra­þyt um að­gerðir sem þessar má vænta þess að hér sé á ferðinni vel út­færð og af­gerandi að­gerðar­á­ætlun. En hún reyndist æði rýr og ó­ljós.“

Þetta segir Þor­steinn Víg­lunds­son, þing­maður Við­reisnar, um að­gerða­á­ætlun stjórn­valda vegna CO­VID-19. Ríkis­stjórnin kynnti á­ætlunina í morgun eins og Frétta­blaðið fjallaði ítar­lega um. Þor­steini þykir lítið til á­ætlunarinnar koma og hefur hann á­hyggjur af stöðu mála.

„Horfur eru á al­var­legu höggi fyrir inn­lent efna­hags­líf ef ekkert verður að gert. Horfur í ferða­þjónustu eru sér­stak­lega dökkar og er nú talað um veru­legan sam­drátt þar á þessu ári vegna veirunnar,“ segir Þor­steinn og bætir við að nú skipti skjót fum­laus við­brögð miklu máli.

Hann segir mikil­vægt að hvetja fólk til að halda ró sinni, við þurfum öll að gæta var­úðar, huga að hrein­læti og fylgja leið­beiningum sér­fræðinga til að tak­marka út­breiðslu veirunnar. Að sama skapi þurfum við að halda á­fram að ganga til starfa okkar og tóm­stunda eins og áður. Engin á­stæða sé til að ör­vænta. Þá sé engin á­stæða til að gera efna­hags­leg á­hrif veirunnar meiri en þegar eru horfur á.

Þor­steinn segir að af­gerandi að­gerðir þurfi til að treysta efna­hags­lífið. Hann segir að at­vinnu­lífið muni þurfa súr­efni næstu vikur og mánuði og nefnir nokkur at­riði sem gætu skipt miklu:

„1. Að fella niður tíma­bundið tryggingar­gjöld af launum. Það gæti dregið úr upp­sögnum og hjálpað fyrir­tækjum að komast yfir erfiðasta hjallann.
2. Að gera fyrir­tækjum í þeim greinum sem harðast eru að verða úti kleift að færa starfs­fólk tíma­bundið á at­vinnu­leysis­skrá án langs upp­sagnar­frests. Slíkar heimildir eru til staðar fyrir fisk­vinnslu og mætti út­færa fyrir ferða­þjónustu svo dæmi séu tekin.
3. Að slaka á þeim eigin­fjár­kröfum sem lagðar hafa verið á banka­kerfið og stuðla þannig að auknu lausa­fé í fjár­mála­kerfinu. Frekari vaxta­lækkanir væru aug­ljós­lega vel þegnar við þessar kring­um­stæður. Seðla­bankinn hlýtur að bregðast þar við.
4. Að ráðast þegar í stað í fjár­festingar­á­tak af hálfu hins opin­bera. Bæta mætti 40-50 milljörðum við fjár­festingar­á­form þessa árs. Það þarf að gerast hratt svo unnt verði að nýta vor og sumar til fram­kvæmda.“

Þor­steinn segir að til að gæta sann­girni verði þó að hrósa ríkis­stjórninni fyrir að ætla að veita fyrir­tækjum frekari gjald­frest á opin­berum gjöldum. „En önnur á­form eru loðin og lítið bæst við fyrri yfir­lýsingar stjórn­valda t.d. hvað varðar opin­berar fjár­festingar.“

Hann segir að lokum að ríkis­stjórnin hafi valið á­sýnd um­fram inni­hald. „Blásið var til blaða­manna­fundar um efna­hags­að­gerðir sem reyndust því miður inni­stæðu­litlar og ó­út­færðar. Ríkis­stjórnin hefur flotið sofandi að feigðar­ósi í efna­hags­málum allt þetta kjör­tíma­bil og virðist því miður ekki enn vera vöknuð.“