Þorsteinn Víglundsson, fyrrverandi þingmaður og ráðherra og núverandi forstjóri Eignharhaldsfélagsins Hornsteins, er ósáttur við Kópavogsbæ.
Þorsteinn deilir frétt Morgunblaðsins þess efnis að Kópavogsbær hafi samþykkt að ráðast í útboð á byggingu nýs Kársnesskóla. Stefnt er að því að taka skólann í notkun árið 2023 og verður hann byggður úr timbureiningum. Áætlað er að rúmir fjórir milljarðar fari í byggingu í skólans á næstu árum.
Þorsteinn er ósáttur við að stærstur hluti framkvæmdarinnar skuli koma úr innfluttum timbureiningum. Þorsteinn viðurkennir fúslega að hann sé ekki hlutlaus í gagnrýni sinni en Hornsteinn á og rekur félög sem starfa meðal annars við mannvirkjagerð á Íslandi.
Segir hann það í meira lagi sérstakt að á sama tíma og atvinnuleysi fer vaxandi, sveitarfélög kvarta undan minnkandi tekjum og talað er um mikilvægi þess að velja innlenda framleiðslu skuli Kópavogur ákveða að stærstur hluti framkvæmdarinnar komi úr innfluttum timbureiningum. „Með því er bærinn að taka ákvörðun um að flytja fjölda starfa úr landi. Störf sem skapað hefðu atvinnulausum tekjur og sveitarfélögum sömuleiðis,“ segir hann en færslu hans má lesa í heild hér að neðan.
„Á sama tíma og atvinnuleysi hér á landi fer ört vaxandi með alvarlegum afleiðingum fyrir þá tæplega 20 þúsund einstaklinga sem ganga nú atvinnulausir.
Á sama tíma og sveitarfélög um allt land kvarta sáran undan minnkandi tekjum, ekki hvað síst vegna minnkandi útsvarstekna af völdum aukins atvinnuleysis.
Á sama tíma og talað er um mikilvægi þess að velja innlenda framleiðslu eins og kostur er til að stuðla að fjölgun starfa.
Á sama tíma og stjórnmálamenn um allt land tala um mikilvægi atvinnusköpunar á þessum óvenjulegu tímum.
Þá ákveður Kópavogsbær, í sinni stærstu opinberu framkvæmd um langt skeið, að fyrirskrifa í hönnun hennar að stærstur hluti framkvæmdarinnar skuli koma úr innfluttum timbureiningum.
Með því er bærinn að taka ákvörðun um að flytja fjölda starfa úr landi. Störf sem skapað hefðu atvinnulausum tekjur og sveitarfélögum sömuleiðis.
Nú er ég ekki talsmaður þess að innlend framleiðsla eigi ekki að þurfa að standa sig í alþjóðlegri samkeppni. Þvert á móti. En það er í meira lagi sérstakt þegar sveitarfélög skrifa innlenda framleiðslu út á hönnunarstigi. Sér í lagi á svo erfiðum tímum sem nú eru.“
