Þórólfur Guðnason sóttvarnalæknir segir miður þegar menn persónugera Covid og aðgerðir í faraldrinum í honum. Þetta segir Þórólfur í áhugaverðu spjalli við Fréttablaðið.
Þórólfur hefur verið gagnrýndur þó nokkuð að undanförnu fyrir að leggja til hertari aðgerðir innanlands. Svo fór á miðnætti í gær að aðgerðir voru hertar og er nú 20 manna samkomubann í gildi í stað 50 manna samkomubanns áður. Smitum hefur farið hratt fjölgandi að undanförnu en þrátt fyrir það hefur Þórólfur sætt oft á tíðum óvæginni gagnrýni, til dæmis meðal stjórnmálamanna og á samfélagsmiðlum:
Ef Ómíkron er miklu meira smitandi en mest smitandi afbrigðið af mest smitandi "drepsótt" allra tíma eins og sumir vilja meina þá er þessi röð besta grínið hans Þórólfs 🤣 pic.twitter.com/vwsOVbg4py
— Sóttólfur 👨🔬 (@sottolfur) December 17, 2021
Og svo sagði ég þeim að miklu mildara afbrigði væri í raun verra og það þyrfti að stórherða aðgerðir. pic.twitter.com/m9cKm8Rf48
— Sóttólfur 👨🔬 (@sottolfur) December 22, 2021
Í viðtali við Fréttablaðið segist Þórólfur einfaldlega vera að sinna sínu hlutverki, embætti sóttvarnalæknis sem er skilgreint í lögum.
„Ég sé ekki nema brot af þessu og er ekki að velta mér upp úr því mikið þannig. Mér finnst það náttúrlega miður þegar menn persónugera Covid og aðgerðir gegn Covid í mér. Ég er að sinna mínu lögbundna hlutverki sem sóttvarnalæknir. Það er útlistað mjög skýrt og skilmerkilega í sóttvarnalögum hvað ég á að gera,“ segir Þórólfur í samtali við Fréttablaðið og bætir við að ef hann gerði það ekki væri hann að bregðast skyldum sínum.
„Mér heyrist meira að segja löglærðir menn vera að tjá sig á þennan máta. Mér finnst mjög miður að menn skulu setja þetta þannig upp, eins og það að ef ég væri ekki í þessari stöðu eða í þessum aðgerðum væri ekkert Covid og þá væru engar aðgerðir, þá væri allt voða gaman. Ég held að menn séu algjörlega að misskilja þetta“, segir hann.
