„Nei, ekkert sérstaklega. Nei, nei. Mismunandi, en ég er tilbúinn að snúa mér að öðru. Þetta hefur tekið mikinn tíma og annað sem þarf að sinna setið á hakanum,“ segir Þórólfur Guðnason sóttvarnalæknir þegar hann er spurður hvort hann sé þreyttur.
Þórólfur er í viðtali í nýjasta tölublaði Læknablaðsins en eins og landsmenn vita hefur mikið álag verið á honum og öðrum innan heilbrigðiskerfisins í COVID-19 faraldrinum.
COVID-19 faraldurinn hefur verið í rénun en síðasta smit hér á landi greindist þann 2. maí síðastliðinn. Þó að góður árangur hafi náðst segir Þórólfur mikilvægt að halda áfram.
„Nú tekur við annar kafli sem er að viðhalda árangrinum, aflétta álögunum sem hafa verið á samfélaginu og tryggja að faraldurinn blossi ekki upp aftur,“ segir hann.
Erfitt að útskýra ef það kæmi bóluefni
Í viðtalinu í Læknablaðinu ræðir hann meðal annars um nálgun Íslands í faraldrinum til þessa og svo sænsku leiðina, sem vakið hefur athygli víða. Þórólfur útskýrir hvers vegna Ísland fór aðra leið en Svíþjóð.
„Dánartíðnin af völdum COVID-19 er um 7 sinnum hærri í Svíþjóð miðað við höfðatölu en hér,“ segir en ef hlutfallið væri það sama hér á landi hefðu andlátið verið um 70 talsins.
„Það hefði verið gríðarlegt högg fyrir heilbrigðiskerfið. Yfirfyllt gjörgæsludeildirnar og haft mikil áhrif á aðra sjúklingahópa.“
Hann bendir á að Svíar hafi talað um að ná hjarðónæmi og á endanum verði allar þjóðir í sömu sporum.
„Ég tel að það sé margt sem við náum að vinna okkur inn með því að gera þetta tiltölulega hægt og láta faraldurinn ekki ríða yfir af miklum þunga. Það er mikilsvert að bíða og fá tíma til að sjá hvort við fáum aðrar lausnir sem hjálpa. Það verður erfitt fyrir Svía, og þær þjóðir sem hafa lent illa í þessu, ef það kæmi bóluefni og þeir kannski búnir að fórna svona miklu að réttlæta af hverju þeir gerðu þetta ekki öðruvísi.“
Hér má lesa viðtalið við Þórólf í heild sinni.
Hér má nálgast Læknablaðið á PDF-formi.
