Þórólfur Guðnason sóttvarnalæknir segir að stjórnvöld hafi gert góða grein fyrir þeirri óvissu sem uppi er vegna bóluefnis við COVID-19. Allar Evrópuþjóðir séu í sömu sporum þegar kemur að afhendingu bóluefnis gegn veirunni.
Þetta kom fram í hádegisfréttum Bylgjunnar og á vef Vísis.
Þingflokkur Miðflokksins sendi frá sér tilkynningu í morgun þar sem fram kom að óskað hefði verið eftir því að Alþingi komi saman ekki síðar en 28. Desember næstkomandi.
„Í ljósi þeirrar óvissu sem nú er uppi varðandi komu bóluefna vegna COVID-19 hingað til lands er nauðsynlegt að þingheimur fái tækifæri til að ræða málið við ríkisstjórnina. Undanfarna daga hafa birst mjög misvísandi upplýsingar um þá samninga sem gerðir hafa verið og ekki síður hvernig bólusetningu verður háttað. Þar vegast upplýsingaóreiða og ráðaleysi stjórnvalda á,“ sagði í tilkynningu flokksins.
Þórólfur benti á að engin þjóð sé með samning við bóluefnaframleiðendur um nákvæma tímasetningu á afhendingu.
„Það er bara þannig. Og það eru ekki bara við Íslendingar, þetta er bara þannig að lyfjafyrirtækin geta ekki og vilja ekki gera þannig samning sem þau geta ekki staðið við,“ segir Þórólfur og bætti við að við hefðum nákvæmar upplýsingar um hversu mikið magn við fáum út marsmánuð. Aðrar Evrópuþjóðir séu í sömu sporum.
„Þannig ég skil ekki hvað menn eru að tala um í þessu sambandi.“
