Þórólfur Guðnason sóttvarnalæknir segir að ekki sé mikið annað í stöðunni en að leggja til hertar aðgerðir. Gerir hann ráð fyrir að skila minnisblaði með tillögum sínum til heilbrigðisráðherra á næstunni.
Þetta segir Þórólfur í samtali við fréttavef Vísis.
Eins og Hringbraut greindi frá í morgun greindust 86 kórónuveirusmit hér á landi í gær og hafa þau ekki verið fleiri í hálfan mánuð. Tólf eru nú látnir af völdum veirunnar hér á landi eftir að einstaklingur á níræðisaldri lést á Landspítalanum.
Þórólfur er ekki ánægður með þessar tölur og bendir á að of margir séu utan sóttkvíar við greiningu. Þá hefur hann áhyggjur af smitum á landamærunum en tíu einstaklingar með virk smit greindust í fyrri skimun á landamærunum í gær og einn í seinni skimun.
Þórólfur segir að Landspítalinn sé kominn að þolmörkum og farsóttahúsið í Reykjavík líka. Ekki þurfi stóra hópsýkingu til að setja kerfið verulega úr lagi. „Þá er þetta áhyggjuefni eins og þetta lítur út,“ segir hann við Vísi.
Víðir Reynisson, yfirlögregluþjónn hjá almannavarnadeild ríkislögreglustjóra, tók í svipaðan streng í viðtali við DV. „Við lítum þetta mjög alvarlegum augum og teljum stöðuna vera mjög alvarlega í augnablikinu.“
