Þórir Kjartansson sagði ótrúlega sögu sína í viðtali við Ísland í dag í gærkvöldi. Þórir var alinn upp við alkóhólisma og byrjaði sjálfur að drekka fjórtán, fimmtán ára og var á kafi í neyslu í mörg ár. Þórir ætlaði sér að enda sem róni en örlögin voru önnur.
Í viðtalinu kom meðal annars fram að Þórir hefði lent í misnotkun sem barn og verið mjög reiður sem barn og unglingur. Honum gekk illa í skóla, var með athyglisbrest og átti erfitt með einbeitingu. Svo fór að honum var vísað úr grunnskóla og kláraði hann því aldrei grunnskólann.
Líf Þóris litaðist mjög af neyslu, fíkniefnasölu og ofbeldi á hans yngri árum og var gististaður hans til að mynda um tíma bílakjallarinn í Ráðhúsinu. Í viðtalinu kemur fram að Þórir hafi svo fengið vinnu hjá Ráðhúsinu sem húsvörður og því kominn býsna langt frá þeim tíma er hann gisti í kjallaranum til að fá þak yfir höfuðið.
Þórir segir að gamall vinur hafi verið einn af örlagavöldunum í lífi hans, en þeir hittust þegar Þórir var í strætó á leið upp í Breiðholt eitt sinn. Gamli vinurinn var edrú og sá hvatti Þóri til að koma með sér í tólf spora prógramm. Eftir það fór líf hans að breytast, hann leitaði til Samhjálpar þar sem hann fékk góða aðstoð og meðal annars vinnu á Nytjamarkaðnum.
Hann kynntist svo konu sem vann hjá Samhjálp. „Við förum að búa saman, eignumst þetta fallega líf og endanum giftum við okkur,“ sagði hann meðal annars í viðtalinu.
Viðtalið við Þóri má sjá í heild sinni hér.
