„Morðið á George Floyd var enn einn dropinn í barmafullan bikar kynþáttamisréttis og lögregluofbeldis gagnvart svörtum Bandaríkjamönnum. Mótmæli og reiði almennings í kjölfar þessa voðaverks eru bæði skiljanleg viðbrögð við óréttlæti og ofbeldismenningu,“ sagði Þórhildur Sunna Ævarsdóttir, þingmaður Pírata, í umræðum um störf þingsins á Alþingi í gær.
Þórhildur ræddi þar atburðina í Bandaríkjunum en eins og kunnugt er hefur hálfgert upplausnarástand ríkt í mörgum borgum Bandaríkjanna vegna dauða George Floyd. Þá hafa viðbrögð Donald Trump við atburðunum vakið athygli en hann hefur hótað því að beita hervaldi ef ekki tekst að lægja mótmælaöldurnar. Þórhildur Sunna segir að viðbrögð Trumps séu ekki sæmandi forseta í lýðræðisríki og beri raunar merki um djúpa andstöðu forsetans við rétt borgaranna til að mótmæla.
Í ræðu sinni sagði Þórhildur Sunna:
„Virðulegi forseti. Stuttu eftir að Donald Trump tók við embætti sagði ég í þessum ræðustól, með leyfi forseta: „Ég hef áhyggjur af því að forseti Bandaríkjanna sé fasisti, kvenhatari og rasisti …“ Þessi ummæli vöktu athygli á sínum tíma og þótti hæstvirtum utanríkisráðherra t.d. tilefni til að segja þau óviðeigandi í kjölfarið.“
Þórhildur sagði að í millitíðinni hefði mikið vatn runnið til sjávar en hún er enn sömu skoðunar og raunar staðfastari en áður.
„Núna hef ég ekki bara áhyggjur heldur tel ég mig vita að forseti Bandaríkjanna er fasisti, kvenhatari og rasisti. Og þó að ég viti að hæstvirtum utanríkisráðherra finnist óviðeigandi að kalla hlutina réttum nöfnum, og þó að ég viti líka að mögulega sé ekki heppileg utanríkisstefna að gera það nákvæmlega þá sakna ég þess að sjá ráðherrann og ríkisstjórnina gagnrýna Bandaríkjaforseta fyrir aðfarir sínar að lýðræðinu vestan hafs. Ég kalla eftir því að rödd Íslands á alþjóðavettvangi heyrist; gegn misrétti og gegn aðförum Bandaríkjaforseta að lýðræðinu þar í landi.“
