„Við sofnuðum á verðinum fyrir langa löngu og KERFIÐ er svo þungt í vöfum að við nenntum ekki að laga til hjá okkur. Samt er kerfið samansafn af fólki sem ætti að sinna vinnunni sinni með hagsmuni barna að leiðarljósi. Við foreldrar eru ekki undanskildir.“
Þetta segir Þorgrímur Þráinsson, rithöfundur og fulltrúi í liðsstjórn íslenska landsliðsins í fótbolta, í pistli á Facebook-síðu sinni.
Þorgrímur gerir þar frétt RÚV sem birtist í gær að umtalsefni, en í henni var greint frá því að á síðasta skólaári hafi 13.662 grunnskólabörn fengið sérkennslu eða stuðning. Um er að ræða hátt í þriðjung allra nemenda. Tekið er fram að 35% drengja og 24% stúlkna hafi fengið sérkennslu en hlutfallið er hæst í fjórða og fimmta bekk.
„Það er ekkert mikilvægara, þegar maður eignast barn, en að hjálpa því á þroskaleiðinni frá fyrsta degi. Við höfum mörg hver brugðist. Ég hefði getað gert miklu betur, það hefðu flest okkar getað gert,“ segir Þorgrímur og bætir við að hægt væri að skrifa heila bók um hvað hefur farið úrskeiðis og aðra, tvöfalt lengri, um hvernig hægt sé að snúa þróuninni við.
„Við erum öll að takast á við heimsfaraldur saman og ef við legðumst öll á árarnar við að bæta námsárangur barna myndum við snúa þessari þróun við á örfáum árum.“
Þorgrímur tekur fram að það að fá sérkennslu sé ekkert til að skammast sín fyrir og það geti jafnvel lýst ákveðnum metnaði. Margt annað hangi þó á spýtunni eins og brottfall úr skóla, dapur lesskilningur og vanlíðan. „Við getum gert betur.“
