Ummæli Helga Magnúsar Gunnarssonar, vararíkissaksóknara um hinsegin hælisleitendur hafa verið mikið í umræðunni eftir að Helgi sagði í samtali við Vísi að „auðvitað ljúga“ hælisleitendur og spurði hvort það ekki nú þegar nóg af hommum á Íslandi.
Þorgerður Katrín Gunnarsdóttir, formaður Viðreisnar, krefst nú aðgerða frá Jóni Gunnarrsyni dómsmálaráðherra í pistli á Facebook.
„Vararíkissaksóknari vænir hinsegin hælisleitendur um lygar og segir þá koma til landsins á annarlegum forsendum. Hann segir heldur engan „skort á hommum“ hér. Eins og einhver ímyndaður kvóti sé uppfylltur. Með þessu sendir hann mjög hættuleg skilaboð til samfélagsins,“ skrifar Þorgerður Katrín.
„Svona ummæli eru alvarleg. Sérstaklega komandi frá handhafa ákæruvaldsins. Orðræðan hefur félagsmótandi áhrif og hatursfull orð geta gert mikinn skaða. Heimurinn er oft minntur á það. Til dæmis Norðmenn fyrir mánuði síðan. Líkt og í fyrradag þegar fórnarlamba árásanna 2011 var minnst,“ bætir hún við.
Um er að ræða einn æðsta embættismann réttarvörslukerfisins. Hann hefur fullan rétt til þátttöku í samfélagsumræðunni. En völdum fylgir ábyrgð og siðareglurnar sem ná til starfsins eru skýrar. Ákærendur þurfa sérstaklega að gæta þess að hlutleysi þeirra sem ákærendur verði ekki dregið í efa. Það á ekki síður við um framgöngu utan starfs.“
„En þetta er ekki fyrsta og eina skiptið sem viðkomandi hefur látið óviðeigandi og beinlínis hatursfull ummæli falla. Hvort sem það er um brotaþola, hinsegin fólk, hælisleitendur eða kvenfólk almennt. Listinn er langur og það segir allt sem segja þarf.
Nýlegar skerðingar á sjálfsákvörðunarrétti kvenna í Bandaríkjunum vekja mikinn óhug. Við erum flest hér sammála um það. Nema kannski vararíkissaksóknari sem hefur áður líkt þungunarrofi við morð og gert lítið úr rétti kvenna,“ skrifar Þorgerður.
Hún segir að þegar æðstu embættismenn fara fram með þessum hætti grefur það undan kerfinu sjálfu og trausti okkar til þess. „Í siðareglum ákærenda er lögð áhersla á að þátttaka þeirra í opinberri umræðu verði ekki til þess að rýra traust og trú almennings á hlutleysi ákæruvaldsins.
Í krafti stjórnunar- og eftirlitsheimilda sinna getur dómsmálaráðherra nú kallað eftir því að agaviðurlögum verði beitt. Það er nefnilega ekki boðlegt að handhafar valdsins láti svona ummæli falla trekk í trekk,“ skrifar Þorgerður.
