Þorgerður Katrín Gunnarsdóttir, formaður Viðreisnar, skýtur fast á Sjálfstæðisflokkinn í aðsendri grein í Morgunblaðinu í dag og segir að kyrrstaðan ein í Evrópumálin haldi klofnum flokknum saman.
Tilefni greinar Þorgerðar er annars vegar leiðaraopna Morgunblaðsins þann 1. apríl síðastliðinn og grein Guðlaugs Þórs Þórðarsonar utanríkisráðherra á síðum blaðsins í síðustu viku.
„Leiðaraopna Morgunblaðsins þennan dag, sem grein ráðherrans birtist, er lýsandi fyrir það hvernig komið er fyrir Sjálfstæðisflokknum, sem áður var kjölfestan í utanríkismálum landsins. Nú birtist flokkurinn í þessu gamalgróna blaði þverklofinn á einu helsta málasviði stjórnmálanna,“ segir Þorgerður og bendir á að Guðlaugur Þór tilheyri frjálslyndari armi flokksins.
„Í greininni ver hann EES-samninginn og aðildina að innri markaði Evrópusambandsins með skynsamlegum rökum. Við erum sammála honum um þau. En ritstjórar Morgunblaðsins, sem eru í hugmyndafræðilegri forystu fyrir íhaldsarmi flokksins, birta leiðara við hliðina á grein ráðherrans til að tæta jafnharðan niður rök hans fyrir EES. Þar er tekið undir þau sjónarmið að Ísland hafi tapað fullveldinu með framkvæmd samningsins. Forherðingin er svo mikil að blaðið gengur í lið með þeim sem halda því fram að aðild Íslands að Mannréttindasáttmála Evrópu stríði gegn fullveldi landsins. Það eru þessi öfgaviðhorf í íhaldsarmi Sjálfstæðisflokksins, sem binda hendur þeirra sem frjálslyndari eru. Þegar þeir verja EES-samninginn er jafnvel sett ofan í við þá samdægurs á sömu opnu Morgunblaðsins.“
Þorgerður bendir á að 33 ár séu liðin síðan umræður um þátttöku Íslands í EES hófust.
„Það var fyrir fall múrsins. Þetta þýðir að allar ákvarðanir um stöðu landsins í fjölþjóðasamvinnu voru teknar á tímum kalda stríðsins. Heimurinn hefur bara gjörbreyst á þessum tíma. En klofningurinn í Sjálfstæðisflokknum kemur í veg fyrir að ræða megi hvort unnt sé að taka ný skref í fjölþjóðasamvinnu til þess að styrkja samkeppnishæfni Íslands í nýrri heimsmynd. Kyrrstaðan ein getur haldið flokknum saman. Hún er tekin fram yfir umræðu, sem leitt getur til öflugri hagsmunagæslu fyrir Ísland. Varðstaða um fortíðina verður mikilvægari en sókn fyrir framtíðina.“
Þorgerður segir að full aðild að Evrópusambandinu sé ekki markmið í sjálfu sér heldur aðeins leið fyrir Ísland – eins og önnur Evrópuríki – til að ná þeim markmiðum sem horft er til.
„Tökum dæmi: Verðbólga er áttföld miðað við Danmörku. Vextir hér eru umtalsvert hærri en þar. Gengissveiflur eru að mati forstöðumanna nýsköpunarfyrirtækja helsta hindrun fyrir þróun þekkingariðnaðar. Ísland er eina vestræna ríkið sem tekur nú erlend lán í stórum stíl með gengisáhættu til að fjármagna ráðstafanir vegna kórónuveirunnar. Utanríkisráðherra veit jafn vel og ég að þetta er stórar hindranir. Fyrir heimili sem fyrirtæki. Þær gera atvinnulífinu erfiðara um vik að hlaupa hraðar. Um þetta deilum við ekki.“
Þorgerður segir að krónunni sé augljóslega ekki treyst sem sjáist meðal annars í því að utanríkisráðherra, ásamt samráðherrum sínum, hefur lagt fyrir þingið að framselja vald til Seðlabankans til að beita höftum líkt og gera þurfti eftir hrun.
„Með öðrum orðum: Það á að setja upp nýjar viðskiptahindranir því krónunni er ekki treyst. Fyrsti áfanginn í tillögum okkar í Viðreisn um ný skref í alþjóðasamvinnu miðar að því að taka upp stöðugleikasamstarf í gjaldeyrismálum við Evrópusambandið. Markmiðið er að tryggja íslensku atvinnulífi sambærilega samkeppnisstöðu og nágrannar okkar njóta. Með slíku samstarfi getum við rutt hindrunum úr vegi án þess að taka upp nýjar viðskiptahindranir. Það eru ríkir hagsmunir,“ segir hún og bætir að lokum við að kyrrstaðan sé versti óvinur atvinnulífsins um þessar mundir.
„Það er því hættulegt að láta klofninginn í Sjálfstæðisflokknum ráða því hvaða mál komast á dagskrá stjórnmálanna.“
