Þórður Snær: Mestu fjár­munir sem greiddir hafa verið í arf á Ís­landi

„Ég held það megi alveg slá því föstu að líkast til eru þetta, alla­vega sem hefur verið gert opin­bert, mestu fjár­munir sem hafa verið greiddir í arf nokkru sinni á Ís­landi,“ segir Þórður Snær Júlíus­son, rit­stjóri Kjarnans, um þá á­kvörðun aðal­eig­enda Sam­herja að fram­selja hluta­bréf sín í fyrir­tækinu til barna sinna.

Þórður Snær ræddi málið í Morgun­vaktinni á Rás 1 í morgun. Þessi gjörningur hefur vakið ýmsar spurningar, meðal annars með hvaða hætti hluta­bréfin voru fram­seld og þá hvort og þá hversu hár skattur er greiddur. Þórður segir að sam­kvæmt svörum sem Kjarnanum bárust í gær­kvöldi sé um að ræða blöndu af fyrir­fram­greiddum arfi og sölu.

Það var á föstu­dag að greint var frá því að aðal­eig­endur Sam­herja hf., þau Helga Steinunn Guð­munds­dóttir, Þor­steinn Már Bald­vins­son, Kristján Vil­helms­son og Kol­brún Ingólfs­dóttir, hefðu fram­selt hluta­bréfa­eign sína í fé­laginu til barna sinna. Fyrir breytingarnar fóru þau saman­lagt með 86,5 prósenta hlut í Sam­herja en hlutur þeirra verður tvö prósent eftir breytingarnar.

Hafa ber í huga að starf­semi Sam­herja heyrir undir systur­fé­lögin Sam­herja hf., sem fer með eignir hér á landi, og svo Sam­herja Holding, sem heldur utan um starf­semi fyrir­tækisins er­lendis en einnig að hluta til hér á landi. Varða breytingarnar ein­göngu hluta­bréfin í fyrr­nefnda fé­laginu.

Þórður Snær sagði að fram­salið væri að líkindum 60 til 70 milljarða króna virði. Hann sagði að sam­kvæmt svörum Sam­herja væri um að ræða blöndu af fyrir­fram­greiddum arfi, sem fyrr segir, og sölu. „En við fengum ekki svör við því hvert virði hlutanna er í þessum við­skiptum og þar af leiðandi er erfitt að reikna beint út hverjar væntar skatt­greiðslur eru,“ sagði Þórður Snær.

Hann bætti við að erfða­fjár­skattur væri 10% og sölu­hagnaður af hluta­bréfum bæri 22% fjár­magns­tekju­skatt. „Það ætti að myndast ein­hver skatt­stofn þar líka. Svo mun þetta koma á hreint þegar við­hlítandi gögnum verður skilað til fyrir­tækja­skrár líkt og lög gera ráð fyrir og þar mun koma þá fram á hvaða gengi þessi við­skipti eiga sér stað og hvaða virði er sett á þessa eignar­hluti.“

Að­spurður hvort ekki væri um hreina og klára gjöf að ræða, sagði Þórður svo ekki vera miðað við þau svör sem Kjarninn hefði fengið. „En auð­vitað eru gjafir líka skatt­lagðar. Það er nánast ó­mögu­legt með góðu móti að færa til verð­mætar eignir án þess að það sé skatt­lagt með ein­hverjum hætti.“