Þórður Snær Júlíusson, ritstjóri Kjarnans, vandar Bjarna Benediktssyni, fjármálaráðherra, ekki orðin í pistli sem hann birti í dag.
„Það daprasta við ákvörðun Bjarna um að brjóta sóttvarnareglur var að viðbrögðin, og eftirmálarnir, voru svo fyrirsjáanlegir,” skrifar Þórður um sóttvarnabrot ráðherra á aðfangadag.
Engar afleiðingar
„Það bjóst bókstaflega enginn við því að formaður Sjálfstæðisflokksins myndi þurfa að takast á við einhverjar pólitískar afleiðingar af gjörðum sínum,” útskýrir Þórður.
„Ekki frekar en þegar það var opinberað að hann átti aflandsfélag í skattaskjóli, þegar hann stakk tveimur skýrslum um hitamál undir stól fram yfir kosningar, leyndi því að faðir hans hefði skrifað meðmælabréf fyrir uppreista æru kynferðisbrotamanns eða þegar hann ákvað að beita sér gegn því að Þorvaldur Gylfason fengi ritstjórastöðu hjá hagfræðiriti sem nær enginn hafði nokkru sinni heyrt um, svo nokkur dæmi séu nefnd.”
Eins og steikarpanna
Þórður bendir á að Bjarni sé oft kallaður teflon-maðurinn vegna þess að ekkert festist við hann. „Hann hristir öll hneykslis- og álitamál sem hann kemur sér í af sér eins og og steikingarpanna ýtir frá sér fitu.”
Bjarni sé sigurvegari þessa máls líkt og annarra að mati Þórðar. „Málið mun ekki hafa neinar afleiðingar vegna þess að Bjarni vill ekki að þetta hafi neinar afleiðingar.” Hann sé of stór til að bera ábyrgð.
„Þegar Bjarni gerir mistök þá er það samstarfsflokkanna að verja þau, og ganga um leið á pólitíska inneign sína. Það er þeirra hlutverk.”
