Þórður Snær Júlíusson, ritstjóri Kjarnans, skýtur föstum skotum á Magnús Ragnarsson, framkvæmdastjóra hjá Símanum, í nýjum leiðara. Tilefnið er umsögn Magnúsar um frumvarp um Ríkisútvarpið þar sem Magnús segir það sóun á opinberum fjármunum að ríkisstyrkja fréttamiðla, vill hann frekar að RÚV verði tekið af auglýsingamarkaði.
„Þess utan má óttast að lýðræðinu stafi hætta af því, að sjálfstæðir fjölmiðlar þurfi að segja sig til sveitar sem flestir hafa nú því miður gert,“ segir í umsögn Magnúsar.
Þórður Snær gerir athugasemd við þetta: „Þar hundaflautar Magnús um að fjölmiðlar muni ekki bíta í höndina sem fæðir þá, þrátt fyrir að hafa ekkert handbært til að byggja þann flautukonsert á,“ segir hann. Til séu rannsóknir sem sýni að þetta sé ekki rétt:
„ Í framsögu Idu Willig, prófessors í fjölmiðlafræði við Hróarskelduháskóla, var fjallað um fjölmiðlastyrki í Danmörku. Þar kom fram að engar rannsóknir, úttektir eða raundæmi styddu flautið um undirlægjusemi fjölmiðla sem nytu opinberra styrkja við valdið,“ segir hann um málþingið sem haldið var nýverið: „Enginn starfsmaður eða sölustjóri frá Símanum var viðstaddur málþingið.“
Þórður bendir svo á að Síminn fái líka ríkisstyrki, sem kallaðir séu endurgreiðslur. „Endurgreiðslur er bara fínt orð sem sett var inn í lögin svo hreintrúuðu kapítalistarnir sem segja sig til sveita með því að taka við ríkisstyrkjum geti sannfært sig um að þetta sé eitthvað annað. Þetta er styrkur. Gjöf.“
Greiðslurnar sem farið hafi til Kjarnans, fyrir að birta þúsundir frétta og fréttaskýringa sé dropi í hafið miðað við greiðslur til Símans, þeir hafi fengið minna en Síminn fékk fyrir þættina Hver drap Friðrik Dór?: „Þættir eins og Logi 3 eða Hver drap Friðrik Dór fengu hvor um sig sambærilega ríkisstyrki og Kjarninn fékk á síðasta ári til að halda úti níu manna fréttafjölmiðlafyrirtæki sem framleiddi á fjórða þúsund fréttir, fréttaskýringar, viðtöl, hlaðvörp og umræðuefni á árinu 2021.“
