Þor­björg: Ljósin slökkt og stólar uppi á borðum – Glóru­laust að hækka á­fengis­gjald

„Á sama tíma og kallað er eftir mark­vissum að­gerðum til stuðnings þeim at­vinnu­greinum sem hafa orðið fyrir þungu höggi boðar ríkis­stjórnin skatta­hækkun í formi hækkunar á­fengis­gjalds,“ sagði Þor­björg Sig­ríður Gunn­laugs­dóttir, þing­maður Við­reisnar, í um­ræðum um störf þingsins í gær.

Þar ræddi Þor­björg um hækkun á­fengis­gjalds sem boðuð er í nýju fjár­laga­frum­varpi fyrir næsta ár. Ef fer sem horfir mun hækkunin nema 2,5 prósentum. Þor­björg segir að hækkunin sé til höfuðs þeim sem minnst þurfa á því að halda.

Sjá einnig: Ólafur ekki sáttur: Ríkið vill hirða 83% af rauð­víns­beljunni og 94% af vodka­­flöskunni

„Veitinga­hús og barir sem róa nú líf­róður fá þessa hækkun á sig af hálfu stjórn­valda. Eitt­hvert sam­hengi þarf að vera á milli veru­leikans og að­gerða stjórn­valda og þessi hækkun er ekki ná­lægt því að ríma við þá stöðu sem veitinga­húsin og öldur­húsin standa nú frammi fyrir. Rekstrar­vandinn er aug­ljós og mikill og það er alltaf að verða ljósara og ljósara að þetta erfiða efna­hags­á­standi lengist og lengist,“ sagði Þor­björg og bætti við að það væri annað en það var að ganga um mið­borg Reykja­víkur að kvöldi til.

„Ljósin á veitinga­stöðunum eru slökkt, stólar standa uppi á borðum og rými til að skapa tekjur er að hverfa. Þess vegna þarf að gera allt sem hægt er til að sporna gegn rekstrar­vanda, sporna gegn at­vinnu­leysi,“ sagði hún.

Hún vísaði meðal annars í spár Vinnu­mála­stofnunar um þróun at­vinnu­leysis, en jafn­vel er búist við 11-12 prósenta at­vinnu­leysi um næstu ára­mót. Það þýðir að 25 þúsund manns verði mögu­lega án vinnu.

„Við sjáum líka að at­vinnu­leysi á Ís­landi hefur vaxið meira en á hinum Norður­löndunum. Á­fallið í ferða­þjónustunni og veitinga­húsunum er langtum þyngra hér en þar. Og það er eins og það vanti upp á skilning á því að veitinga­húsin eru vita­skuld hluti af þeirri keðju og því höggi sem ferða­þjónustan er að verða fyrir. Núna þegar við okkur blasir annar þungur vetur sem verður lík­lega erfiður, ekki bara hvað varðar sótt­varnir heldur líka efna­hags­lega og fé­lags­lega, þurfum við að gera allt sem við getum sam­eigin­lega til að takast á við af­leiðingarnar. Þá þurfa stjórn­völd að vera læs á að­stæður og bregðast við í sam­ræmi. Eitt stórt at­riði er að stjórn­völd forðist að bæta við út­gjalda­hlið fyrir­tækja.“