Þor­björg: Er nauð­syn­legt að nota appið þegar smit eru lítil sem engin í samfélaginu?

„Er virki­lega nauð­syn­legt af stjórn­völdum að notast við rakningar­for­rit þegar staðan er sú að smit eru lítil sem engin í sam­fé­laginu?“

Þessari spurningu varpaði Þor­björg Sig­ríður Gunn­laugs­dóttir, þing­maður Við­reisnar, fram á Al­þingi í gær í um­ræðum um störf þingsins. Eins og kunnugt er þurfa ferða­menn, inn­lendir og er­lendir, sem koma til landsins að gangast undir skimum við komuna. Þá þurfa þeir einnig að notast við rakningarappið svo­kallaða sem getur létt mjög undir við að rekja ferðir ein­stak­linga með hugsan­legt CO­VID-19 smit.

Þor­björg benti á í ræðu sinni að örfá CO­VID-19 smit hefðu greinst hér á landi undan­farnar vikur og auð­vitað væru allir lands­menn þakk­látir fyrir það.

„Mestu tak­mörkunum hefur nú verið af­létt en eftir stendur sumt, þar á meðal smitrakningarappið. Við aðrar að­stæður hefði svona app á vegum stjórn­valda sem safnar upp­lýsingum um ferðir ein­stak­linga þótt meiri háttar inn­grip í frið­helgi einka­lífs og vakið mikla um­ræðu. Þjóðin sýndi hins vegar á­byrgð og hún sýndi traust en um þriðjungur þjóðarinnar sótti þetta app sem var kynnt sem tíma­bundin ráð­stöfun. Með því létti þjóðin vinnu smitrakningar­teymis sótt­varna­læknis og ríkis­lög­reglu­stjóra.“

Þor­björg sagði að nú þegar stæði til að opna landið á nýjan leik þyrftu ferða­menn að gangast undir skimum, sem væri mikil­væg og nauð­syn­leg for­senda, en þeir væru einnig hvattir til að sækja appið sem myndi rekja ferðir þeirra hér á landi. Þá væri þjóðin hvött til að halda á­fram að nota appið.

„Hér finnst mér þurfa að staldra að­eins við. Ég minni á það að tak­markanir á réttindum fólks og inn­grip í einka­líf þess þarf að rök­styðja og það þarf að nálgast það sem frá­vik. Er virki­lega nauð­syn­legt af stjórn­völdum að notast við rakningar­for­rit þegar staðan er sú að smit eru lítil sem engin í sam­fé­laginu? Erum við þá ekki farin að nálgast grund­vallar­réttindi eins og frið­helgi einka­lífs af tölu­verðri létt­úð? Mér finnst vanta sam­talið hérna.

Þor­björg spurði hvort stjórn­völd ættu ekki að sýna sömu á­byrgð og al­menningur gerði.

„Þrátt fyrir tvö­falt sam­þykki, að notandi þurfi að sam­þykkja appið og síðan að gefa sam­þykki fyrir notkun upp­lýsinganna, stendur eftir að að­gerðin er bein­línis hönnuð til að safna upp­lýsingum um fólk til að af­henda stjórn­völdum þær. Á meðan appið er í símanum eru ferðir fólks raktar. Í því ljósi spyr ég hvort stjórn­völd ættu ekki að leiða sam­tal um það hve­nær þau sjái eigin­lega fyrir sér að þessari ráð­stöfun linni.“