„Ég steig mín fyrstu skref í meistaraflokk 14 ára. Þjálfarinn hafði orð á því á nánast hverri einustu æfingu að ég væri með stór brjóst,“ segir í frásögn ungrar konu sem birtist á vefnum Síðasta sagan.
Vefurinn hefur vakið talsverða athygli en á honum safnar Margrét Björg Ástvaldsdóttir félagsfræðingur miður skemmtilegum frásögnum kvenna í íþróttum. Margrét er þjálfari körfuboltaliðsins Aþenu og leikmaður Fylkis í Úrvalsdeild kvenna í knattspyrnu en rannsókn sem hún gerði árið 2016 leiddi í ljós gríðarlegt kynjamisrétti í umgjörð knattspyrnuhreyfingarinnar. Eftir rannsóknina hóf Margrét að safna sögum, en á síðunni má sjá sögur frá íþróttakonum úr körfubolta, fótbolta, handbolta og öðrum íþróttum.
Í einni sögunni lýsir ung kona sem byrjaði ung að æfa með meistaraflokksliði í knattspyrnu ósæmilegum athugasemdum frá þjálfara sínum.
„Hann spurði mig líka óþægilegra spurninga varðandi brjóstin og brjóstastærð mjög reglulega, fyrir framan allt liðið og aðra sem nálægt voru. Þegar ég var ný búin í fitumælingu á hans vegum þar sem ég mældist 13% fita. Þá hafði hann fyrir því að segja öllum frá því að það væri allt í brjóstunum. Sami þjálfari þjálfaði líka yngri flokk karla þar sem hann spurði iðkendur hvort við stelpurnar værum ekki í rúnkminni þeirra. Þessi maður hefur þjálfað mörg félagslið kvenna og karla sem og yngri landslið,“ segir í frásögninni.
Sagan er ein af fjölmörgum sem birst hafa á síðunni að undanförnu. Í einni sögunni segir stúlka úr körfubolta frá því að dómari hafi sent henni skilaboð á Instagram fyrir leik sem hann dæmdi hjá henni.
„Hann sendir mér oft kynferðisleg skilaboð um hvað ég er með flottan rass og hvað það er erfitt fyrir hann að einbeita sér í leikjum. Ég var orðin pirruð á þessu svo ég bað hann að hætta eða að ég myndi segja frá. Í næsta leik sem hann dæmdi hjá mér fékk ég tæknivillu frá honum og var ósátt. Eftir leikinn sendi hann mér skilaboð um að ef ég sendi honum myndir af líkamanum mínum myndi hann dæma betur fyrir mig. Dómarinn dæmir ennþá í dag.“
