Vólódímír Selenskí, forseti Úkraínu, lauk rétt í þessu ávarpi sínu fyrir Alþingi Íslendinga. Birgir Ármannsson, forseti Alþingis, tók fyrstur til máls og byrjaði á að bjóða alla velkomna á þennan einstaka viðburð. Hann sagði Íslendinga og þingmenn hafa fylgst með styrknum í Úkraínumönnum og sagði Alþingi fordæma harðlega framgang Rússa.
Selenskí hóf ræðu sína á góðri íslensku og sagði „góðan daginn." Hann sagðist þakklátur fyrir tækifærið að fá tala fyrir framan Alþingi Íslendinga sem hann sagði það endurspegla hinn frjálsa heim.
„Þetta er mikill heiður fyrir mig að fá mæla hér á Alþingi sem endurspeglar hinn frjálsa heim,“ sagði Selenski. „Við erum mjög tengd í menningarlegu tilliti og höfum verið það í yfir þúsund ár,“ bætti hann við.
Selenskí sagði að það væri ýmislegt sem tengdi Ísland og Úkraínu en nú væri Úkraína þolandi árása frá Rússum. „Þeir vilja ná landi okkar og segja að Úkraína eigi ekki neinn rétt til sjálfstæðis,“ sagði Selenskí.
„Við horfum kannski ekki á sömu ógnir og þið, með eldgos og jarðskjálfta, en við lítum á ykkur sem nágranna,“ sagði Selenskí og bætti við að verið væri að berjast fyrir grundvallar mannréttindum í stríðinu í Úkraínu.
Hann sagðist þakklátur fyrir að Íslendingar tóku þótt í efnahagsaðgerðum gegn Rússlandi. „Ég hvet ykkur eindregið til að halda þessari aðstoð áfram og setja þrýsting á Rússland. Enginn viðskipti við einræðið,“ sagði Selenskí og bætti við að öll lönd ættu að hætta að kaupa rússneska olíu.
„Það skiptir ekki máli hvort þjóðin er stór eða lítil heldur skiptir framlag hvers og eins máli,“ sagði Selenskí.
Hann sagði að fram undan væri mikil enduruppbygging í Úkraínu og sagði að reynsla Íslendinga í orkumálum gæti reynst vel á því sviði.
„En fyrst verðum við að vinna þetta stríð,“ sagði Selenskí að lokum og stóð þingheimur upp og klappaði.
Sjá mátti að ávarp Selenskí snerti við þingmönnum en í útsendingunni sáust tár á hvarmi sumra viðstraddra.
