„Mikið er um það að foreldrar séu að taka hliðar af hefðbundnum ungbarnarúmum og stilla þeim upp við hlið hjónarúmsins. Þetta er lífshættulegt!“
Svo segir í Facebook-færslu sem birtist á síðunni Árverkni – slysavarnir barna en á síðunni er fjallað um ýmsa þætti sem lúta að öryggi barna í dagsins amstri. Í dag birtist færsla á síðunni um ungbarnarúm sem ástæða er til að benda sérstaklega á.
Í færslunni segir að tvö börn séu látin í Evrópu sökum þessa. „Slysin urðu með þeim hætti að líkami barnanna féll niður á milli og þau sátu föst á höfðinu og hengdust,“ segir í færslunni.
Tekið er fram að hefðbundið ungbarnarúm eigi að standa eitt og sér og alls ekki þétt upp við hjónarúmið jafnvel þó hliðin sé ekki tekin af. Ef hæðin á dýnunni í barnarúminu er lægri en hliðin á dýnunni í hjónarúminu þá getur barnið endað með andlitið þétt upp að henni of kafnað.
„Framleiddar eru sérstakar vöggur sem ætlaðar eru til þess að standa þétt upp að hjónarúmum en með þeim fylgja ítarlegar upplýsingar um örugga notkun þeirra og ber að fylgja þeim leiðbeiningum í einu og öllu.“
Þá er bent á það í færslunni að ekki er öruggt að nota vöggur frá Blindravinnustofunni þar sem sett hefur verið á þær sölubann sökum þess að þær og dýnan í þeim uppfylla ekki gildandi staðla. Alvarleg slys hafa orðið við notkun þeirra þegar að þær hafa oltið um koll.
Hér má sjá tilkynningu frá Neytendastofu um málið
