Maðurinn sem grunaður er um að hafa numið Madeleine McCann á brott á Algarve í Portúgal árið 2007 heitir Christian Brueckner og er 43 ára gamall. Fjölmiðlar í Þýskalandi, Portúgal og Bretlandi greina frá þessu.
Á blaðamannafundi saksóknara í Þýskalandi í morgun staðfesti lögregla þann grun að Madeleine McCann væri látin og gengið væri út frá því að hún hefði verið myrt. Greint var frá nýjum vendingum í málinu í gær þar sem fram kom að grunur beindist að 43 ára gömlum Þjóðverja.
Sagður hafa játað á bar árið 2017
Madeleine McCann hvarf á sumarleyfisstaðnum Praia da Luz í Algarve á Portúgal þann 3. maí árið 2007, skömmu fyrir fjögurra ára afmælisdaginn sinn. Talið er að einhver hafi brotist inn í íbúð sem fjölskyldan dvaldi í og numið Madeleine litlu á brott.
Martin Brunt, fréttamaður Sky News, segir að nafn Christians hafi fyrst komið inn á borð lögreglu árið 2017. „Mér skilst að hann hafi verið á bar með öðrum manni í Þýskalandi um það leyti sem 10 ár voru liðin frá hvarfi Madeleine. Í sjónvarpinu á umræddum bar var fjallað um hvarfið og hann sagði eitthvað á þá leið að hann vissi hvað hefði gerst. Hann er einnig sagður hafa sýnt viðkomandi myndband af því þegar hann nauðgaði konu,“ segir Martin.
Þetta myndband varð svo til þess að hann var sakfelldur og dæmdur í fangelsi fyrir umrædda nauðgun sem átti sér stað á Algarve árið 2005, tveimur árum fyrir hvarf Madeleine. Fórnarlambið í því máli var 72 ára kona, ferðamaður frá Bandaríkjunum. Dómur var kveðinn upp í málinu í desember síðastliðnum. „Þetta varð til þess að hann komst undir smásjá lögreglu,“ segir Martin.
Framfleytti sér með glæpum
Christian þessi bjó á Algarve um það leyti sem Madeleine McCann hvarf. Hann kom þangað upphaflega sem 18 ára bakpokaferðalangur árið 1995 og dvaldi þar nær sleitulaust til ársins 2007. Í þýskum fjölmiðlum kemur fram að hann hafi unnið við ýmislegt, til dæmis sem þjónn, en framfleytt sér einnig með glæpum, þar á meðal innbrotum og fíkniefnasölu. Hann bjó að hluta til í hvítum sendibíl af gerðinni Volkswagen T3 og bjó einnig um tíma mjög nálægt staðnum þar sem Madeleine hvarf. Talið er að hann hafi þó átt heima í sendibílnum um það leyti sem Madeleine hvarf.
Átti 30 mínútna símtal skömmu fyrir hvarfið
Í umfjöllun Telegraph kemur fram að lögregla geti slegið því föstu að Christian hafi verið í Praia de Luz þann 3. maí árið 2007. Farsímagögn sýni að hann hafi átt 30 mínútna símtal að kvöldi 3. maí en aðeins þremur tímum síðar var tilkynnt um hvarf Madeleine. Lögregla hefur biðlað til þeirra sem voru í samskiptum við hann að gefa sig fram.
Þá er bent á það í umfjöllun Telegraph að Christian þessi hafi einnig átt bifreið af gerðinni Jaguar sem var á þýskum númerum. Bílinn hafði hann hjá sér í Portúgal og var hann skráður á hann, allt til 4. maí árið 2007 að bíllinn var færður á annað nafn. Þykir það vekja ákveðnar grunsemdir.
Christian þessi situr sem fyrr segir inni fyrir nauðgun en Christian Hoppe, fulltrúi lögreglunnar í Þýskalandi, segir að hinn grunaði hafi einnig hlotið dóma fyrir kynferðisbrot gegn börnum.
Talin hafa verið myrt
Skömmu eftir hvarf Madeleine virðist Christian hafa flutt aftur til Þýskalands þar sem hann hlaut meðal annars dóma fyrir fíkniefnasölu og kynferðisbrot. Fundurinn þar sem hann tjáði sig um hvarf Madeleine og sýndi vini sínum myndband af nauðgun fór fram í maí 2017 en í júní sama ár er hann sagður hafa farið aftur til Portúgals. Hann var hins vegar sendur aftur til Þýskalands skömmu síðar þar sem hann hafði hlotið fimmtán mánaða fangelsisdóm fyrir kynferðisbrot. Hann lauk afplánun þess dóms í ágúst 2018 en mánuði síðar, í september 2018, var hann handtekinn á Ítalíu vegna nauðgunarinnar á bandaríska ferðamanninum.
Óvíst er hvað gerist næst í málinu en breska lögreglan hefur ekki viljað ganga jafn langt og þýska lögreglan. Rannsakar hún málið enn sem mannshvarf en ekki morð. Christian Hoppe segir að rannsókn þýskra lögregluyfirvalda og upplýsingar sem aflað hefur verið bendi til þess að Madeleine McCann hafi verið myrt.
