Þetta er maðurinn sem talinn er hafa drapið Olof Palme

Ríkis­sak­sóknari Sví­þjóðar, Krister Peters­son, upp­lýsti í morgun að Stig Engst­röm, sem stundum var kallaður Skandia-maðurinn, hefði að líkindum drepið Olof Palme, þá­verandi for­sætis­ráð­herra Sví­þjóðar, að kvöldi 28. febrúar 1986.

Engst­röm þessi fékk viður­nefnið Skandia-maðurinn þar sem hann starfaði í Skandia-byggingunni skammt frá vett­vangi morðsins. Hann var einn af þeim fyrstu sem kom á vett­vang eftir morðið og lá undir grun í málinu til að byrja með. Lög­reglu­menn sem rann­sökuðu málið á sínum tíma gátu þó ekki með nokkru móti bendlað Engst­röm við það og árið 1987 var rann­sókn á meintum þætti hans hætt. Taldi lög­regla að hann hefði einungis verið til­tölu­lega ó­á­reiðan­legt vitni.

Það var á mánu­dag sem ríkis­sak­sóknari Sví­þjóðar boðaði til blaða­manna­fundar eftir að skot­vopnið sem varð Palme að bana fannst. Á blaða­manna­fundinum í morgun sagði Peters­son að niður­staða rann­sóknarinnar væri sú að Engst­röm hefði myrt Palme. Frá­sögn hans hefð ekki komið heim og saman við frá­sagnir vitna þegar farið var að skoða málið betur.

Sjónir yfir­valda fóru að beinast að Engst­röm í ríkari mæli árið 2017 þegar rann­sóknar­nefnd fór yfir öll gögn málsins. Lýsingar hans á því sem átti að hafa gerst um­rætt kvöld voru ekki í sam­ræmi við frá­sagnir annarra vitna á svæðinu. Lýsing vitna á fatnaði morðingjans komu heim og saman við fötin sem Engst­röm klæddist um­rætt kvöld. Þá liggur fyrir að Engst­röm hafði að­gang að vopnum og var í nöp við Olof Palme á þeim tíma sem morðið var framið.

Engst­röm þessi var starfs­maður Skandia-trygginga­fé­lagsins en svo vildi til að höfuð­stöðvar fyrir­tækisins voru skammt frá morð­staðnum. Palme hafði verið í kvik­mynda­húsi á­samt eigin­konu sinni um­rætt kvöld þegar byssu­maður gekk upp að honum og skaut hann.

Engst­röm svipti sig lífi árið 2000 og eðli málsins sam­kvæmt þýðir það að engin á­kæra verður gefin út og rann­sókn málsins því sjálf­hætt, svo lengi sem engar nýjar upp­lýsingar koma fram.

Engst­röm þessi var grafískur hönnuður. Hann fæddist á Ind­landi árið 1934 og bjó þar með sænskum for­eldrum sínum til tólf ára aldurs að hann flutti aftur til Sví­þjóðar. Engst­röm starfaði um tíma fyrir Hægri­flokkinn þar sem hann vann meðal annars við gerð aug­lýsinga. Hann sagði þó skilið við flokkinn eftir ó­sætti. Hann var tví­kvæntur og skildi við seinni konu sína árið 1999. Hann svipti sig lífi árið 2000, 66 ára að aldri.