„Ég ætla að leyfa mér að upplifa þá reiði sem býr í brjósti mér þegar ég skoða þær staðreyndir sem ég hef aðgang að er varða líf, heilsu og tilveru Eflingarfélagsfólks og fjölskyldna þess,“ segir Sólveig Anna Jónsdóttir, formaður Eflingar í samtali við Fréttablaðið í dag.
Þar segist Sólveig ætla að nýta daginn í dag, 1. maí - baráttudag verkalýðsins, í að hugleiða stöðu vinnandi fólks á Íslandi, líkt og á hverjum degi.
„Og ég ætla að blása sjálfri mér baráttuanda í brjóst og lofa sjálfri mér því, enn eina ferðina, að ég ætla að gera allt sem í mínu valdi stendur til þess að breyta þessu ástandi og til þess að berjast af öllum kröftum fyrir því að loksins renni upp sú stund að verka- og láglaunafólk á Íslandi fái það sem það á sannarlega inni hjá þessu samfélagi,“ segir Sólveig.
