„Þessi þjálfari er að þessu þegar konan hans á von á barni“

„Þessi þjálfari er að þessu þegar konan hans á von á barni. Hann hættir ekki fyrr en ég hóta því að segja konunni hans,“ segir í frá­sögn ungrar konu sem birtist á vefnum Síðasta sagan.

Vefurinn hefur vakið tals­verða at­hygli en á honum safnar Margrét Björg Ást­valds­dóttir fé­lags­fræðingur miður skemmti­legum frá­sögnum kvenna í í­þróttum. Margrét er þjálfari körfu­bolta­liðsins Aþenu og leik­maður Fylkis í Úr­vals­deild kvenna í knatt­spyrnu en rann­sókn sem hún gerði árið 2016 leiddi í ljós gríðar­legt kynja­mis­rétti í um­gjörð knatt­spyrnu­hreyfingarinnar. Eftir rann­sóknina hóf Margrét að safna sögum, en á síðunni má sjá sögur frá í­þrótta­konum úr körfu­bolta, fót­bolta, hand­bolta og öðrum í­þróttum.

Sagan sem vísað er til hér í byrjun er að­eins ein af mörgum sem birst hafa að undan­förnu. Svo virðist vera sem málið sé nokkurra ára gamalt og segir í sögunni að um­ræddur þjálfari í þjálfara­t­eymi karla­lands­liðsins hafi byrjað að spjalla við hana um körfu­bolta á sam­fé­lags­miðlum.

„En alltaf þegar hann sá að ég var á djamminu þá sendir hann meira ó­við­eig­andi á net­heimum. Hann bað mig til dæmis um að koma með sér inn á klósett og á hótel,“ segir í frá­sögninni og því bætt við að konan hans hafi átt von á barni og á­reitið hafi ekki hætt fyrr en stúlkan hótaði að segja konunni hans frá.

Króaðar af úti í horni

Þá segir í annarri sögu frá tveimur vin­konum, 18 ára, sem voru að stíga sín fyrstu skref í A-lands­liði kvenna. „Það var grill­veisla og liðið fer saman út á lífið á­samt þjálfara. Þjálfarinn króar okkur af út í horni og við förum að spjalla bara, allir hressir. Við spyrjum hann hvers vegna ein stúlka gefi ekki kost á sér í þetta skipti sem var mikil­vægur hlekkur liðsins. Þjálfarinn lætur þetta út úr sér:

“Ég skal segja ykkur það ef þið komið í sleik við mig”

“Ég segi ykkur það ef þið komið með mér í threesome”

Í frá­sögn sinni segir stúlkan að þær vin­konurnar hafi ekkert komist og þjálfarinn verið veru­lega drukkinn. „Það er ekki fyrr en að er­lendur leik­maður úr karla­deildinni sér að við erum í vand­ræðum og hjálpar okkur út úr þessu. Þetta at­vik kom okkur í veru­lega opna skjöldu. Við vorum nýjar, ekki öruggar með okkar sæti í liðinu. Vegna at­viksins vorum við með á­hyggjur. Að vera með skæting gæti komið niður á tæki­færi okkar í lands­liðinu.“

Þá segir í sögunni að þjálfarinn hafi að lokum verið rekinn vegna trúnaðar­brests, en ekki hafi verið minnst á að þetta at­vik hafi verið á­stæðan fyrir upp­sögninni. „Eftir upp­sögnina fer hann að þjálfa annað kvenna fé­lags­lið. Þessi maður starfar í virtu starfi fyrir KKÍ í dag.“