Sjónvarpsmaðurinn og borgarfulltrúinn fyrrverandi Gísli Marteinn Baldursson hefur ljóstrað upp um hvað varð til þess að hann hætti í Sjálfstæðisflokknum. Gísli Marteinn var vonarstjarna flokksins fyrr á öldinni og var hann nálægt því að verða borgarstjóraefni flokksins árið 2006. Hann var fyrst kjörinn í borgarstjórn árið 2002 en hætti árið 2013.
Hann segir í viðtali í hlaðvarpi Verzlunarskóla Íslands að ákvörðunin hafi verið tekin eftir leiðinlegan fund í Valhöll, höfuðstöðvum flokksins.
„Ég var á einhverjum hræðilega leiðinlegum fundi uppi í Valhöll þar sem var verið að skamma mig fyrir að vilja gera strætó betri, vilja hjólastíga, vilja að fólk myndi ganga, og vilja aðeins grænni Reykjavík, sem átti ekki upp á pallborðið hjá einhverjum mjög gamaldags, en ágætum körlum, sem voru þarna alveg eldrauðir í framan öskrandi á mig að ég væri kommúnisti að vilja gera grænni borg,“ segir Gísli Marteinn.
