Sjálfstæðisflokkurinn í Kópavogi er ekki stjórntækur og er klofinn í herðar niður. Þrír Sjálfstæðismenn í bæjarstjórn hafa gert ítrekaðar tilraunir til að velta bæjarstjóranum, Ármanni Kr. Einarssyni úr sessi. Þetta segir Theodóra S. Þorsteinsdóttir, bæjarfulltrúi BF Viðreisnar í Kópavogi, í samtali við Eyjuna.
Ármann Kr. Ólafsson, bæjarstjóri Kópavogsbæjar, var í viðtali við Mannlíf. Þar neitaði hann að ósætti væri innan bæjarstjórnarinnar og hann væri að hætta sem bæjarstjóri. Fréttablaðið fjallaði nýverið um að ágreiningur væri í bæjarstjórnarhópi Sjálfstæðismanna sem gæti endað með að bæjarstjórinn yfirgefi sviðið. Trúnaðarbrestur og skiptar skoðanir um samstarfsflokk í bæjarstjórn eru meðal orsaka. Mikill titringur væri innan meirihlutans sem mætti rekja allt aftur til bæjarstjórnarkosninga fyrir tveimur árum.
Sjá einnig: Er Ármann að hætta?
Að loknum kosningum árið 2018 horfði Ármann til þess að mynda bæjarstjórn með sameinuðum lista Bjartrar framtíðar og Viðreisnar.
Það var þá sem Sjálfstæðismennirnir Karen Elísabet Halldórsdóttir, Guðmundur Geirdal og Margrét Friðriksdóttir settu Ármanni stólinn fyrir dyrnar. Samkvæmt heimildum Fréttablaðsins hefur hann aldrei fyrirgefið flokksfélögunum þá framgöngu.
Ármann svarar fyrir þetta í Mannlíf og segir allt í himnalagi:
„Ég skil hvorki upp né niður í þeim fréttaflutningi. Það er nákvæmlega ekkert til í þessu. Það gengur allt mjög vel í Kópavogi og það hefur aldrei hvarflað að mér að hætta. Ég er ekki á leiðinni út.“
Theodóra segir Ármann fara með rangt mál
„Það er svo magnað þegar fólk stekkur af stað með kústinn til að reyna að láta allt líta vel út, út á við, þegar það er allt í klessu. [...] Að sjálfsögðu er ósætti í bæjarstjórn. Alvarlegasta ósættið er innan Sjálfstæðisflokksins sem er klofinn í herðar niður. Ákveðinn hluti flokksins með hina svokölluðu þremenninga í fylkingarbrjósti hefur gert ítrekaðar tilraunir til að velta bæjarstjóranum úr sessi. Það er hins vegar ekki mitt hlutverk að útskýra það, Ármann ætti sjálfur að opinbera það. Sannast sagna er Sjálfstæðisflokkurinn ekki stjórntækur því þar er hver höndin upp á móti annarri og kjarninn í meirihlutanum sjálfum er langt í frá heill.“
Sjá einnig: Bæjarstjórinn sagður á útleið
Theodóra segir þetta bitna á bæjarbúum.
„Þetta ósætti bitnar ekki bara á sjálfstæðismönnum í Kópavogi. Það bitnar á öllum Kópavogsbúum því það gengur allt á hálfum hraða. Tja nema skipulagsmálin á Fannborgarreitnum. Meirihlutinn keyrir þau í gegn á sama tíma og fólki er óheimilt að koma saman. Þau keyra það í gegn með Framsóknarflokkinn í fararbroddi í skipulagsmálum sem er stórfurðulegt því sá flokkur var iðinn við bókanir um sama reit á síðasta kjörtímabili. Þær bókanir gengu gegn þessari framkvæmd. Þær fjölluðu um mikilvægi þess að í Fannborginni ættum við að hafa forgang um samstarf við byggingarsamvinnufélög ofl. Greidd voru atkvæði gegn Borgarlínunni og svona mætti halda áfram.“
Theodóra heldur áfram: „Nú hefur orðið kúvending, fyrri skoðanir skipta engu máli og þar virðast engin prinsipp ráða för. Fannborgarreiturinn er risavaxið skipulagsmál þar sem verið er að fara úr 5.000 fm í 28.000 fm. Aldrei í veröldinni hefði mér dottið í hug að svo margir fermetrar væru á dagskrá þegar við seldum Fannborgarhúsin. Þar fyrir utan er tillagan misheppnuð í alla staði og munum við í BF Viðreisn aldrei samþykkja hana.“
Þá skorar hún á meirihlutann að hysja upp um sig buxurnar og byrja að vinna fyrir bæjarbúa.
Frétt Eyjunnar má lesa í heild hér.
