„Það eru 50 kíló farin. Ég var orðin 142 kíló þegar ég var sem þyngst,“ segir Thelma Dís Magnúsdóttir í samtali við Hringbraut. Rúmt ár er nú liðið síðan Thelma fór í magaermi og er óhætt að segja að mikið vatn hafi runnið til sjávar síðan þá.
Thelma hafði sett sér það markmið eftir aðgerðina að missa 50 kíló og náði hún þeim áfanga fyrir skemmstu. Thelma ræddi við Hringbraut um ferlið, hvað varð til þess að hún ákvað að fara í magaermi og hvaða breytingar hafa orðið á lífi hennar eftir aðgerðina. Hún gekkst undir aðgerðina þann 10. september 2019 hjá Aðalsteini Arnarsyni á Klíníkinni í Ármúla.
Hafði prófað ýmislegt
„Ég hafði í rauninni prófað alla kúra og þegar maður hafði prófað þetta allt með engum árangri þá fór maður að skoða aðra möguleika,“ segir Thelma sem nefnir að ketó hafi í raun verið eini lífsstíllinn sem hún átti eftir að prófa.
Sumarið 2019 stóð Thelma á ákveðnum tímamótum í lífi sínu en þá var hún nýbúin að klára háskólanám í Danmörku og var aðeins með sumarstarf hér á landi. „Ég vissi svo í rauninni ekkert hvað ég var að fara gera. Ég var ekki með fasta vinnu og ákvað að panta mér tíma hjá lækni og kýla á þetta í kjölfarið. Af hverju ekki þegar maður hefur prófað allt annað?“
Thelma, sem er 27 ára, segist í raun hafa verið í yfirþyngd alla sína ævi. Á unglingsárunum fór hún þó að fitna meira þó hún hafi alla tíð verið nokkuð virk og sterk að eigin sögn. Nú þegar 50 kíló eru farin hefur ýmislegt breyst í lífi Thelmu, til dæmis viðhorfið til matar. Ýmislegt sé nú auðveldara en það var áður.
„Líkamleg heilsa er allt önnur og þó maður hafi tekið kúra og kúra þá er maður meira að spá í að fá ekki samviskubit þegar maður fær sér eitthvað. Maður var að brjóta sig niður ef maður fékk sér eitthvað en í dag er það ekki þannig. Ég er enn að leyfa mér hluti, til dæmis að fá mér pizzu, en maður er líka farin að hugsa meira um næringuna. Að því leyti hefur hugarfarið breyst.“
Alltaf verið líkamlega sterk
Úthaldið er meira en áður en eins og Thelma lýsir sjálf hefur hún verið virk undanfarin ár og stundað reglubundna hreyfingu. „Eins og ég hef oft sagt að þá var ég hraust feitabolla,“ segir hún og hlær en bætir við að þegar hún bjó í Danmörku hafi hún stundað Crossfit og alla tíð verið líkamlega sterk.
„Ég hef verið í einkaþjálfun með systur minni sem er mjög venjuleg kona og ég var alltaf að lyfta þyngra en hún.“
Thelma segir að markmiðin séu og hafi verið skýr. „Ég var alltaf með þetta markmið að ná 50 kílóum af mér og nú þegar ég hef náð því langar mig að byggja mig upp og vera hraustari. Núna er ég ekkert endilega að fókusa á kílóin heldur meira að tóna mig og svoleiðis.“
Upplifði fordóma frá læknum
Aðspurð hvort hún hafi orðið vör við einhverjar viðhorfsbreytingar frá fólki viðurkennir hún að hafa upplifað ákveðna fitufordóma á árum áður, einkum frá læknum. „Ég lenti til dæmis í árekstri og var að drepast í bakinu og mér var bara sagt að fara út í hálftíma göngutúr. Það var á því tímabili sem ég bjó í Danmörku og labbaði og hjólaði allt,“ segir hún en svo virðist vera sem læknar hafi gert ráð fyrir að hún stundaði enga hreyfingu þar sem hún þótti of þung. Hún segir að þetta hafi að vissu leyti breyst.
Thelma segir að þeir sem hyggjast fara sömu leið og hún þurfi að standa með þessari ákvörðun og ekki fara í felur. Sjálf er hún til dæmis aldrei feimin við að segja neinum að hún hafi farið í þessa aðgerð. Það telur hún að hafi hjálpað sér. Hún ítrekar þó að hér sé hún að lýsa sinni reynslu og geti því aðeins talað fyrir eigin hönd.
„Ef einhver hrósar mér og spyr hvað ég sé að gera þá byrja ég á því að segja að ég hafi farið í aðgerðina. Ég hef aldrei verið feimin við að segja fólki að ég hafi tekið þessa ákvörðun.“ Thelma tekur að lokum fram að góður stuðningur sé mikilvægur, en sjálf kveðst hún hafa fengið ómetanlegan stuðning frá fjölskyldu og vinum í ferlinu sem hún er þakklát fyrir.
