Höfundar Áramótaskaupsins í ár eru þau Hugleikur Dagsson, Lóa Hjálmtýsdóttir, Vala Kristín Eiríksdóttir, Þorsteinn Guðmundsson, Bragi Valdimar Skúlason og Katla Margrét Þorgeirsdóttir. Líkt og í fyrra verður leikstjórn í höndum Reynis Lyngdal.
Í tilkynningu sem RÚV hefur sent frá sér segir Reynir erfiðleikar vegna kórónuveirufaraldursins kalli á nærgætni en efnistök sem gleðja og hlýja. Hann segir að gerð Áramótaskaupsins sé ein skemmtilegasta vinna sem hægt er að hugsa sér.
„Að skoða og greina samtímann í gegnum grín og hafa tækifæri til að vinna með fyndnasta fólki á landinu eru forréttindi. Þegar mér bauðst að gera Skaupið í ár eftir að hafa gert, að því er mér finnst, vel heppnað skaup í fyrra þurfti ég ekki að hugsa mig lengi um. Erfiðleikar vegna kórónuveirufaraldursins og afleiðinga hans á allt samfélagið kalla á nærgætni og efnistök sem gleðja og hlýja. Við viljum vekja von. Þó er engin hræðsla við að gera gagnrýnið grín þegar það á við á sama tíma og virðing fyrir fólki er í hávegum höfð. Vonandi tekst okkur sem að þessu vinnum að gera árinu góð skil og skemmta landanum í leiðinni,” segir Reynir í tilkynningunni.
Skarphéðinn Guðmundsson, dagskrárstjóri RÚV, segir að síðasta Áramótaskaup hafi verið afar vel heppnað hjá Reyni og gagnkvæmur áhugi hafi verið á að endurtaka leikinn.
„Það sem stóð þar upp úr og gladdi okkur sérstaklega var hversu vel tókst upp við að ná þeirri næsta ómögulega breiðu skírskotun sem Skaupið þarf að hafa og þá einkum með tilliti til vals á viðfangsefni, hins breiða aldurshóps sem horfir á Skaupið og svo auðvitað smekks á gríni,“ segir Skarphéðinn.
Þá hafi það gert útslagið þegar Reynir og félagar hjá Republik lögðu til þetta „geggjaða skrifarateymi sem samanstendur af nokkrum af okkar reyndustu grínhöfundum í bland við yngri sem eru tvímælalaust með þeim okkar allra efnilegustu,“ segir Skarphéðinn og bætir við að til umfjöllunar verður afar sérstakt ár, hreint fordæmalaust, og þá sé eins gott að þeir sem tækli það kunni til verka.
Tökur á Skaupinu hefjast í nóvember.
