Þátturinn Zúú­ber hættir eftir niðrandi um­mæli í garð Valdimars

For­svars­menn út­varps­þáttarins Zúú­ber hafa til­kynnt nokkuð ó­vænt að þátturinn verði ekki á dag­skrá framar. Mjög hörð gagn­rýni kom fram á þáttinn síðast­liðinn laugar­dag eftir að greint var frá niðrandi um­mælum út­varps­konunnar Siggu Lundar í garð tón­listar­mannsins Valdimars Guð­munds­sonar.

„Takk fyrir sam­fylgdina í vetur, við tókum þá á­kvörðun eftir sam­ræður okkar á milli og við fyrir­tækið að láta staðar numið sem hópur núna. Sigga heldur sínu striki á Bylgjunni. Takk fyrir að hlusta. Þangað til næst, Svali, Gassi og Sigga.“

Engar frekar út­skýringar fyrir þessari á­kvörðun eru gefnar upp í færslunni sem birtist á Face­book nú í há­deginu. Ekki þykir þó úti­lokað að hún tengist at­burðum síðustu daga.

Sjá einnig: Hneykslast á ummælum Siggu Lundar í garð Valdimars: „Reiðin kraumar inn í mér“

Þátturinn var á dag­skrá FM957 í sex ár en hætti árið 2010. Í fyrra­sumar hóf þátturinn göngu sína á ný á Bylgjunni og átti hann að vera á dag­skrá út þennan vetur eftir því sem næst verður komist.

Eins og fyrr segir kom harka­lega gagn­rýni fram á þáttinn um helgina vegna téðra um­mæla Siggu Lundar. Voru þátta­stjórn­endur þá að tala um holda­far og fitu­for­dóma þegar Sigga, ein­hverra hluta vegna, minntist á Valdimar Guð­munds­son.

„Mér finnst mjög leiðin­legt að nefna þetta en ég held að margir hafi orðið varir við sína fitu­for­dóma, vegna þess að ég varð það, þegar við lásum greinina um daginn um á­kveðinn söngvara sem á von á barni með kærustunni sinni,“ sagði Sigga og vísaði þar til Valdimars og unnustu hans, Önnu Bjarkar Sigur­jóns­dóttur, en þau til­kynntu fyrir skemmstu i að þau ættu von á sínu fyrsta barni saman.

Systir Valdimars, Sylvía Guð­munds­dóttir, var meðal þeirra sem gagn­rýndi Siggu Lund hvað harðast. „Þessi kona beitti bróðir minn of­beldi í beinni út­sendingu. Van­virðingin sem hún sýnir honum og ást­kæru barns­móður hans er því­lík,“ sagði Sylvía í færslu á Face­book.