Notkun þara við Íslandsstrendur gæti orðið stór stoð í atvinnulífinu og velta fyrirtæki sem nota þara nú þegar nokkrum milljörðum á ári. Byggja má upp atvinnugrein sem veltir tugum milljarða ef fé til rannsókna og nýsköpunar eykst, segir Berta Daníelsdóttir, framkvæmdastjóri Íslenska sjávarklasans í þættinum 21 sem sýndur var í gærkvöldi.
Um einn milljarður tonna af þara myndast við strendur landsins árlega
Berta bendir á að 15 fyrirtæki noti nú þegar þara og þaramjöl í margvíslega framleiðslu. Áætluð velta þeirra er um 5 milljarðar króna á árinu 2019. Fyrirtækið sem á lengsta sögu á þessu sviði hérlendis, og er enn starfandi frá því um miðjan áttunda áratug síðustu aldar, er Þörungaverksmiðjan Thorverk á Reykhólum sem framleiðir gæðamjöl úr þara og skaffar mikið inn í líf- og heilsuiðnaðinn.
„Þaraskógar eru nærri allan hringinn í kringum landi. Hafró hefur gert rannsóknir á þessu og þar er talað um að um þörungasvifið sem myndast við Íslandsstrendur á hverju ári séu einn milljarður tonna. Þannig að það er nóg að vinna með,“ segir Berta.
„Við sjáum aðallega í okkar fjöruferðum þang og þara liggjandi á ströndinni og í fjörunni. En undir yfirborði sjávar eru skógarnir,“ bendir Berta enn fremur á.
Mikilvægi þess að byggja upp nýjar atvinnugreinar á Íslandi er aldrei augljósari en nú. Ekkert er gefið þegar kemur að burðarásunum í atvinnulífinu; ferðaþjónustan er viðkvæm og það er rekstur álveranna orðinn líka - og aflabrestur á sér stað nú árlega í fiskveiðum, loðnan fannst ekki - aftur.
Nýja greiningu Sjávarklasans á möguleikum á nýrri atvinnugrein byggt á nýtingu á þaraauðlindinni má finna á vef klasans sjavarklasinn.is.
