„Takk fyrir að sýna það enn einu sinni hversu gagnslaus stjórnmálamaður þú ert Sigmundur,“ segir Björn Leví Gunnarsson, þingmaður Pírata. Hann sendir Sigmundi Davíð Gunnlaugssyni, formanni Miðflokksins, kaldar kveðjur á jólunum.
Björn Leví deilir á Facebook frétt RÚV frá því í gær þar sem fjallað var um nýbirta grein Sigmundar Davíðs í tímaritinu Spectator. Í grein sinni gagnrýndi Sigmundur nokkuð kirkjuna hér á landi, hún væri með rangar áherslur og oft þögul í málum sem skipta miklu máli. Hún væri dæmd til að mistakast ef hún reyndi um of að fanga tíðarandann.
Sigmundur tók sem dæmi auglýsingaherferð kirkjunnar í haust þar sem Jesús var með brjóst og varalit. Þá hefði verið minnst oftar á Gretu Thunberg en Jesú í síðustu nýársmessu.
Björn Leví gefur lítið fyrir grein Sigmundar Davíðs og segir í kaldhæðni: „Einmitt, hættum með kvenpresta og allt það. Það hefði aldrei átt að hætta með rannsóknarréttinn!. Ekkert nema mistök að fylgja tíðarandanum sko.“
