„Ég lenti í þeirri lífsreynslu að það lést maður í höndunum á mér fyrir viku. Það var eitt það erfiðasta sem ég hef lent í,“ segir hlaðvarpsstjórnandinn Þórarinn Hjartarson.
Þórarinn mætti í útvarpsþáttinn Ísland vaknar á K100 á dögunum. Þar segist hann hafa farið að pæla í framlagi fólks.
„Ég fór að pæla í framlagi fólks. Þetta var eldri maður sem var ekki frægur fyrir neitt en hafði svo rosaleg áhrif á rosalega mikið af fólki. Ég fór að pæla í því hvað við erum að gera í samfélaginu. Ég fór að pæla í framlagi almennt,“ segir Þórarinn.
„Við pælum ótrúlega mikið í fólki sem er frægt og að umræðan eigi að hringsnúast um alla sem eru frægir og eru að „gera eitthvað“. Eins og þú sért ekki að gera eitthvað þegar þú ert að mæta í vinnu að setja upp auglýsingaskilti eða eitthvað þess háttar. En þetta fólk er mjög nauðsynlegt,“ segir Þórarinn.
„Það var svolítið afleiðingin af því að lenda í þessari lífsreynslu. Þetta var maður sem vann á sjó í mjög langan tíma. hann vann í litlum smábæ. Hann hóf að brýna flakhnífa út af því að það kunnu það alltof fáir. Pælið í þeim afleiðingum sem það olli í kjölfarið. Að fólk gat haft í sig og á bara út af tilvist eins manns,“ segir Þórarinn.
„Ég held að á Íslandi séum við í miklu nærtækara umhverfi gagnvart framleiðslukeðjunni. Ég held það sé miklu auðveldara fyrir okkur að átta okkur á því hevsu mikil áhrif við höfum á allt okkar nærumhverfi,“ segir hlaðvarpsstjórnandinn.
„Mér finnst umræðan miklu meira snúast um að við séum að rífast á Twitter og að það eigi að vera það sem við eigum að spá í. Í stað þess, eins og þegar við erum á leiðinni í vinnuna, að vera hreykin af því,“ segir Þórarinn.
