„Skaðinn sem Jón Gunnarsson hefur á stuttri ráðherratíð náð að vinna samfélaginu verður ekki bættur í bráð,“ svona hefst færsla Þórunnar Ólafsdóttur sem hún birti á Facebook síðu sinni í dag.
Í færslunni fer hún yfir þá ákvörðun dómsmálaráðherra að neita flóttafólki sem er barnlaust og heilbrigt um heilbrigðisþjónustu en einnig þá orðræðu sem hún telur hann hafa notað gegn flóttaólki sem sótt hefur um vernd hér á Íslandi. Sjálf hefur Þórunn hfur unnið mikið hjálparstarf fyrir hönd flóttafólks á Grikklandi og á eyjunni Lesbos og er því vel kunnug því starfi sem lítur til aðstoðar við umsækjendur verndar.
„Orðræðan sem hann notar einkennist af mannnfyrirlitningu sem við höfum undanfarin ár aðallega séð í holræsum internetsins - kommentakerfunum. Hann teygir sig sífellt lengra í afmennskun fólks á flótta og þykir t.d. eðlilegt að refsa einum jaðarsettasta hópi samfélagsins með því að svipta fólk grundvallarréttindum eins og þaki yfir höfuðið og aðgangi að heilbrigðisþjónustu,“ segir í færslu Þórunnar en Jón tilkynnti í dag hann leitaðist eftir því að lögfesta það að barnlausir og heilbrigðir einstaklingar sem dveljast ólöglega á Íslandi yrði neitað um heilbrigðisþjónustu.
„Hann talar um að fólk sé “ólöglegt” og gefur í skyn að samfélaginu stafi af því ógn. Að það eigi ekkert gott skilið og sé fyrir okkur hinum.
Það er nákvæmlega ekkert eðlilegt við það að fólki, hvort sem það er barnlaust eða almennt hraust, sé neitað um aðgang að grundvallaraðstoð eins og heilbrigðisþjónustu. Er það í alvörunni samfélagið sem við viljum vera?“ Spyr Þórunn sem telur það undarlegt að fólk sem flýr stríð eða ómögulegar aðstæður fái þessar móttökur hér á landi.
„Á hinn bóginn er svo mikilvægt að muna að dómsmálaráðherra er ekki einvaldur. Hann situr í umboði allra ríkisstjórnarflokkanna og það er á endanum ríkisstjórn Katrínar Jakobsdóttur sem er ábyrg fyrir tjóninu sem þessi skaðvaldur hefur unnið samfélaginu okkar. Orð skipta máli og orðræðan sem Jón Gunnarsson notar, án athugasemda samstarfsfólks síns, eru skilaboð þess efnis að fólk í ömurlegum aðstæðum sé óvelkomið og jafnvel ógn við samfélagið sem það vill bara fá að vera hluti af“ segir Þórunn sem telur að tal um „Þetta fólk“ kyndi undir hatri og jaðarsetningu.
