Einar Þorsteinsson, segist ekki ætla að ganga inn í núverandi meirihluta. Hann mætti á Hringbraut og verður í viðtali í Fréttavaktinni í kvöld á slaginu 18:30.
,,Meirihlutinn féll og það eru skýr skilaboð frá kjósendum. Því er enginn að fara að ganga inn í neinn núverandi meirihluta næstu fjögur árin. Við erum að tala um nýjan meirihluta með nýjum málefnasamningi,“ segir Einar í viðtalinu.
Engar formlegar viðræður um meirihluta eru hafnar. Óformlegar viðræður fara nú fram og segist Einar hafa rætt í Hildi, Dag, Þórdísi Lóu og Kolbrúnu í dag. Hann segir líklegt að einhverjir dagar líði áður en meirihluti verði myndaður.
„Það þarf að myndast traust milli fólks. Ég ætla ekkert að drífa mig í þessu en það er þó gott að hafa ákveðinn tímaramma því borgarstjórn kemur saman í byrjun júní og þá er gott að vera búin að ljúka þessu,“ segir Einar.
