Fyrir ári fór Svava Magnúsdóttir til Tenerife með vinkonum sínum sem átti að vera skemmtiferð en á augnabliki umturnaðist líf hennar.
Í viðtali í helgarblaði Fréttablaðsins ræðir Svava hvernig líf hennar breyttist eftir að hún varð fyrir því að toppur á pálmatré féll á hana er þær vinkonur sátu á veitingastað.
„Tréð féll á mig og Sif, blöðin féllu yfir borðið og skrámuðu þær sem sátu móti okkur.
Ég heyrði bara stelpurnar öskra upp yfir sig: „Guð minn góður, Svava!“ og Silla kom að mér, hélt í höndina á mér þegar ég sagði við hana: „Ég finn ekki fyrir fótunum.“ Ég var í sandölum og horfði á fætur mína líflausa og endurtók að ég gæti ekki hreyft þá.
Ég heyrði hana þá garga „She can’t feel her legs!“ Þjónninn hélt svo stólnum til að reyna að halda mér uppi. Silla hefur sagt mér að hún hafi séð þetta augnablik ljóslifandi lengi á eftir þegar hún lokaði augunum: Andlit mitt og hræðsluna.“
